Жүдо бөхийн эрэгтэйчүүдийн 49, эмэгтэйчүүдийн 34, холимог багийн 12 дахь удаагийн насанд хүрэгчдийн улсын аварга шалгаруулах тэмцээн Хэнтий аймгийн Чингис хотод боллоо.
33 байгууллагын 320 орчим жүдоч өрсөлдсөн энэхүү тэмцээн эрэгтэй, эмэгтэй нийт 14 жингийн ангиллаар аваргуудаа тодруулав. Үндэсний шигшээ багийн тамирчдыг сонгон шалгаруулах, орон нутагт жүдо бөхийн спортыг жигд хөгжүүлэх зорилготой зохион байгуулсан тус тэмцээнээс Хил хамгаалах ерөнхий газрын “Хилчин” спорт хороо таван алт, хоёр мөнгө, дөрвөн хүрэл медаль багийн дүнгээр тэргүүлсэн бол түүхт 80 жилийн ойтойгоо золгож буй Батлах хамгаалах яамны харьяа “Алдар” спорт хороо хоёр алт, дөрвөн мөнгө, таван хүрэл медаль хүртсэнээр удааллаа. Тэгвэл Шүүхийн шийдвэр гүйцэтгэх ерөнхий газрын харьяа “Сүлд” спорт хорооныхон хоёр алт, хоёр мөнгө, нэг хүрэл эхний гурав багтсан. Хоёр алт, нэг мөнгөтэй “Гүрү дожо”, нэг алт, хоёр мөнгө, дөрвөн хүрэлтэй “Женко” клуб айрагдсан байна. Нийт 33 клуб, дэвжээ, спорт хорооноос 17 нь ямар нэгэн медаль хүртлээ.
2026 оны УАШТ-ээс зургаан шинэ аварга төрсөн бөгөөд шилдэг жүдочоор 66 кг-ын жинд түрүүлсэн К.Ёолк, -78 кг-д түрүүлсэн Ж.Урангоо нар шалгарсан юм. Мөн энэ жилээс эхлэн Монгол Улсын 11 удаагийн аварга, Азийн хошой аварга, Азийн наадмын хүрэл медальт, гранпри тэмцээний гурван алтан медальт, олон улсын хэмжээний мастер П.Лхамдэгд өөрийн барилддаг байсан -78 кг-ын жинд түрүүлсэн тамирчинд жил бүр нэрэмжит шагналаа олгохоор болсон. Тэгвэл анхны шагналыг “Орхон ирээдүйн одод” дэвжээний залуу тамирчин Ж.Урангоо гардлаа. Харин тэмцээний шилдэг шүүгчээр олон улсын “А” зэрэглэлийн шүүгч Д.Энхтүвшин, БНСУ-аас урилгаар ирж ажилласан Хан Сун Нам нарыг тодруулжээ. Улсын аваргад түрүүлсэн тамирчдыг ирэх дөрөвдүгээр сарын 16-нд БНХАУ-д болох насанд хүрэгчдийн ААШТ-д эх орноо төлөөлөн оролцох эрх олгосныг Монголын жүдо бөхийн холбооноос албан ёсоор зарлалаа.
Үүнээс гадна холимог багийн УАШТ-д 80 жилийн түүхтэй “Алдар” спорт хороо түрүүлж, аваргаа хамгаалах зорилготой байсан “Хилчин” удаалсан бол “Сүлд”, “Женко” хүрэл медалиар энгэрээ мялаав.
