Монголын Волейболын Холбооноос амжилттай зохион байгуулсан анхдугаар "Хөгжлийн лиг"-ийн тэмцээний хаалтын үйл ажиллагаа болж шилдгүүдээ тодрууллаа. Энэ нь дотоод дахь лигийн системтэй тэмцээнүүдийг нэмж, улмаар тэмцээнүүд хоорондын уялдаа холбоог үүсгэж, клубүүдын үйл ажиллагааг илүү өргөн хүрээтэй болгож мөн өсвөр, залуу үеийн тамирчдад илүү боломж олгож, тэдний туршлага ур чадварыг хөгжүүлэх зорилготой чухал тэмцээн байлаа. Хаалтын үйл ажиллагаанд МВХ-ны ерөнхийлөгч Н.Амарзаяа, МВХ-ны ерөнхий нарийн бичгийн дарга, ОУХМ А.Очгэрэл, "Хөгжлийн лиг"-ийн тэмцээнийг зохион байгуулах хорооны дарга Ж.Наранбаатар болон удирдах зөвлөлийн гишүүд оролцож, шагналыг гардууллаа.

"Хөгжлийн лиг"-ийн 2025/26 оны улирлын хүрээнд нийт 44 өдөр 168 тоглолт болж, медалийн эзэд тодорсон. Эрэгтэйчүүдийн багуудаас Б.Баярбилэг эзэнтэй "Энержи Мазаалай" баг аваргын цом, алтан медалийн эзэд боллоо. Мөнгөн медалийг Т.Жавхлан эзэнтэй "Натур Бакс" баг, хүрэл медалийг Э.Бат-Эрдэнэ эзэнтэй "Өмнөговь Ёлууд" баг хүртлээ.

"Натур Бакс" багийн хувьд медальт байрт шалгарсан багуудтай харьцуулахад легионер тоглогчгүй байснаараа ялгаатай. Дасгалжуулагч Б.Мөнгөнхуягийн удирдлага дор "Хөгжлийн лиг"-т тун амжилттай оролцсон "Буганууд" тэмцээний туршид тамирчдын хувийн болоод багийн бүх үзүүлэлтээр хамгийн өсөлттэй нь байж чадлаа. Талбай дээрх тоглолтоороо ч тэмцээн эхлэхээс дуусах хүртэл түвшин, хэмнэлээ хадгалж, хамгийн жигд байсан баг юм. Түүнчлэн тоглолт бүрт гараа сэлгээ нийлээд хамгийн олон тоглогч талбайд гаргаж байсан баг гэдгээрээ онцлогтой. 

"Өмнөговь Ёлууд" багийн хувьд тэмцээний эхлэл сайнгүй байж, эхний 6 тоглолтоос 4 хожигдоод байсан ч Куба улсаас легионер довтлогч Арричеа багийн бүрэлдэхүүнд нэгдсэнээс хойш эхний тойргийн сүүлийн 3 тоглолтод дараалан хожсон. Улмаар 2-р тойргоос Киргиз довтлогч Азирет Ильяз багийн бүрэлдэхүүнд нэгдсэнээр тус баг лигийн хамгийн хүчтэй өрсөлдөгчдийн нэг болж чадсан билээ. "Ёлууд" гадны тамирчидтай тоглож эхэлснээсээ хойш зөвхөн тэмцээний аварга болсон "Энержи" багт л 3:2 харьцаатай хожигдож, бусад 11 тоглолтод нь хожсон бөгөөд нийт 13-5 амжилттай тойргийн шатыг дуусгасан юм. Улмаар хүрэл медалийн төлөөх тоглолтод "Мегастарс" багийг 3:0 харьцаатай хожиж, медалийн болзол хангасан билээ. 

Билгэдлийн багийг тодруулахад шилдэг хамгаалагчаар “Энержи” багийн хамгаалалтын ноён нуруу, багийнхаа тоглолт, найруулга, хэмнэлийг лигийн турш амжилттай удирдан авч явсан гол тоглогч Т.Анар тодорсон байна. 

Голын хаагчийн байрлалд Дуалла Сталлоне (Энержи), Х.Төгөлдөрхараа (Бакс) нар шилдгээр шалгарлаа. Конго улсын тамирчин Сталлоне тэмцээний туршид хаалт болон хагас намын довтолгоонд онцгой байж, хаалтаар авсан оноогоор лигийн бүх тоглогчийг тэргүүлсэн төдийгүй шигшээ цувралын 2 тоглолтод “Энержи” багаас хамгийн онцлох тоглолт үзүүлсэн тоглогчдын нэг юм. 

Х.Төгөлдөрхараагийн хувьд мөн хаалтын үзүүлэлтээр лигт тэргүүлсэн шилдэг тоглогчдын нэг. Тэрээр энэ удаагийн лигт нийт 20 тоглолтод бүгдэд нь оролцож, багийнхаа амжилтад голлох оролцоотой байв. “Натур Бакс” клубийн ирээдүй болсон тоглогчдын нэг, 2 метр өндөртэй Х.Төгөлдөрхараа өдгөө дөнгөж 17 настай. Энэ насны тамирчид “Дээд лиг”-т оролцлоо гэхэд талбайд тогтмол тоглож, өсөж хөгжих боломж нь хомс байдаг. Тэгвэл “Хөгжлийн лиг”-ийн тэмцээнийг зохион байгуулснаар тэдэнд дараагийн түвшинд гарч, ахин дэвших боломжийг бүрэн олгож байгаагаараа давуу талтай. 

Өндрийн довтлогчийн байрлалд “Натур Бакс” багийн онооны лидер, довтолгоо, хамгаалалтынх нь гол тоглогч, 19 настай залуу тоглогч М.Мөнхжаргал болон “Өмнөговь Ёлууд” багийн ахлагч, 18 настай залуу довтлогч Г.Баяржавхлан нар шилдгээр тодорсон байна. Тэдний хувьд хэн хэн нь багийнхаа довтолгооны гол үүрэгтэй байсан бөгөөд лигийн тэмцээний туршид оролцоо 100% байсан тоглогчид юм. 

Шилдэг холбогчоор “Энержи” багийн залуу тоглогчдыг өөрийн туршлага, ур чадвараараа амжилттай чиглүүлэн тоглосон спортын мастер У.Одгэрэл шалгарлаа.

“Энержи Мазаалай” багийн багийн лидер Ж.Батбилэг өөрийн байрлал буюу диагоналийн довтлогчийн байрлалдаа шилдэг болохоос гадна тэмцээний хамгийн үнэ цэнтэй тоглогчоор тодорсон байна.

Гэмтлийн улмаас "Дээд лиг"-ийн тэмцээнийг өнжөөд байсан Ж.Батбилэгийн хувьд энэ тэмцээний эхнээс багаа манлайлан тоглож, өөрийн тоглолт, ур чадвар, статистик үзүүлэлт гээд бүх талаараа тоглогчдыг тэргүүлж байсан юм. Тэрээр ийнхүү 20 насандаа Хөгжлийн лигийн анхны “Тэргүүн тоглогч”-оор шалгарлаа. 

Тэмцээний шилдэг дасгалжуулагчаар “Энержи Мазаалай” багийн ахлах дасгалжуулагч Э.Танхил-Од тодорлоо. Түүний удирдлага дор баг нь лигийн тэмцээний тойргийн шатанд 16-2 амжилттай тэргүүлж, шигшээ цувралтай нийлээд нийт 20 тоглолтоос 18 хожил авч, лигийн аварга болсон юм. 

Эмэгтэйчүүдийн багуудаас “Doctors” баг анхдугаар Хөгжлийн лигийн тэмцээнд түрүүлж, цомын эзэд боллоо. Дэд байрт гавьяат багш Д.Солонго дасгалжуулагчтай “MMB Sport Academy” баг, гутгаар байрт О.Түвшинбаяр дасгалжуулагчтай “Golden Ball Lynx” баг шалгарчээ. 

Билгэдлийн багийн тоглогчдоор дараах тоглогчид нэрлэгдэж, тус тусын байрлалдаа шилдгээр шалгарчээ. Шилдгээр шалгарсан монгол тамирчдын дундаж нас 20 хүрэхгүй (19.8) бөгөөд 18 настай Г.Ганцэцэг, 17 настай А.Амарбаясгалан, Э.Аззаяа нарын залуу тоглогчид өөрсдийгөө бүрэн нээн харуулж чадсан тэмцээн боллоо. 

• Хамгаалагч: Г.Золзаяа (Lynx)
• Голын хаагч: Г.Ганцэцэг (MMB), М.Северино (Doctors)
• Өндрийн довтлогч: Г.Болор-Эрдэнэ (Doctors), Э.Аззаяа (MMB)
• Диагоналийн довтлогч: А.Амарбаясгалан (Lynx)
• Холбогч: Э.Батцэцэг (Doctors)

Хамгийн үнэ цэнтэй тоглогчоор “Doctors” багийн "уураг тархи" болсон тоглогч Э.Батцэцэг тодорлоо. Нас залуу ч "Дээд лиг"-ийн тэмцээнд 2019 оноос эхлэн тоглосон арвин туршлагатай Э.Батцэцэг энэ жилийн тэмцээнд баг нь аварга болоход нэн чухал үүрэгтэй тоглож, 21 насандаа Хөгжлийн лигийн анхны "Тэргүүн тоглогч" боллоо.

Тэрээр өнгөрсөн хугацаанд "Уурхайчин" клубийн нас насны багуудын хамтаар олон амжилт гаргаж байсан ч анх удаа МВХ-ны лигийн тодотголтой тэмцээнд шилдэг болж байна. Энэ улирлын хувьд “Doctors” баг клуб, аймаг, сургуулиуд гээд тал талаас бүрдсэн олон тоглогчтой байснаас гадна ОХУ, БНСУ, Доминикан улсын гадны тоглогчидтой оролцсон тул тэднийг удирдах, багийнхаа тоглолтыг нэгтгэх тал дээр холбогчийн үүрэг хамгаас чухал байсан билээ. 

Шилдэг дасгалжуулагчаар “Doctors” багийн ахлах дасгалжуулагч Ц.Батсайхан шалгарсан байна. Түүний баг улирлын 16 тоглолтоос 12 хожил, 38 оноо авч багуудыг тэргүүлсэн. Улмаар шигшээ цуврал тоглолтуудад 2:0 (3-0, 3-2) харьцаатай өрсөлдөгчөө хожиж аваргын болзол хангасан юм. 

Мөн эрэгтэйчүүдийн багуудаас "Мегастарс" (4-р байр), "Аранзал" (5-р байр), "Алтайн Барс" (6-р байр), эмэгтэйчүүдээс "Prime Ilch Dynasty" (4-р байр), "Selenge SBM" (5-р байр), "MUBSI" (6-р байр) багууд эхний зургаан байрт шалгарсан амжилтаараа дараа улирлын тэмцээнд оролцох эрхээ авлаа. Бусад багуудын хувьд шинэ улирлын өмнө сонгон шалгаруулалтын тэмцээнд оролцохоор болж байна. Дашрамд дурдахад энэ улирлын өмнөх сонгон шалгаруулах тэмцээнд эрэгтэйчүүдийн 23 баг өрсөлдсөнөөс шилдэг 10 баг лигийн тэмцээний эрхээ аван өрсөлдсөн юм.

Ийнхүү хоёр сар гаруйн хугацаанд үргэлжилсэн "Хөгжлийн лиг"-ийн тэмцээний 2025/26 оны улирал албан ёсоор "хөшгөө хаалаа". Оролцсон баг бүр нь, тоглогч бүр нь амжилт, ур чадвараа ахиулж чадсан, тоглогч бүрт тодорхой түвшний хөгжил дэвшил гарсан маш чухал тэмцээн болж өндөрлөлөө.

Мөн энэ өдрүүдэд тэмцээний эхний хоёр байрт шалгарсан шилдэг багууд "Дээд лиг"-ийн тэмцээний сүүлийн хоёр байрт шалгарсан багуудтай ирэх улирал "Дээд лиг"-т оролцох эрхийн төлөө өрсөлдөж байна.