Эрүүл мэндийн сайд Ж.Чинбүрэн Эм, эмнэлгийн хэрэгслийн хяналт, зохицуулалтын газар (ЭЭХХЗГ) -т ажиллалаа. ЭМЯ-ны харьяа ЭЭХХЗГ нь 104 албан хаагчтай ба бүртгэл зөвшөөрөл, аюулгүй байдал тандалт, хяналт шалгалт, үйлдвэрлэл хангамж, Эм эмнэлгийн хэрэгслийн үндэсний лавлагаа лаборатори зэрэг зургаан газар нэгжтэйгээр ажиллаж байна.

Тус агентлаг нь 2025 онд эм ханган нийлүүлэх байгууллага, эмийн сан, эмнэлгүүдэд төлөвлөгөөт болон төлөвлөгөөт бус 1622 хяналт шалгалт хийж 7815 зөрчил илрүүлжээ. Үүнээс 2996-г нь газар дээр нь арилгуулж, 422 байгууллагад хугацаатай албан шаардлага хүргүүлэн ажиллав.

Монгол Улсын хэмжээнд эм, эмнэлгийн хэрэгсэл импортлох, ханган нийлүүлэх тусгай зөвшөөрөлтэй нийт 485 байгууллага, эм, эмнэлгийн хэрэгсэл үйлдвэрлэх, экспортлох тусгай зөвшөөрөлтэй 29 байгууллага үйл ажиллагаа явуулж байна.

2026 оны 01 дүгээр сарын 12-ны байдлаар Монгол Улсад 3914 эм, үүнээс уламжлалтын 546, үндэсний үйлдвэрийн 342 эм бүртгэлтэй байна.

Улсын хэмжээнд нийт 2906 эмийн сан байгаагаас ЭМД-аар хөнгөлөлттэй олгох эмийг цахим жороор олгодог 1560 эмийн сан байна. Өнгөрсөн 2025 онд нийслэл болон 21 аймгийн хэмжээнд нийт 83,696 цахим жор бичжээ.

ЭЭХХЗГ-ын Эм шинжлэх лабораторид 2025 онд 21 эмийн хэлбэрт нийт 2007 дээжийг шинжилгээнд хамруулсан ба 1519 нь импортынх, 488 нь дотоодын эм, биобэлдмэл, биологийн идэвхт бүтээгдэхүүн байв.

Эмийн зар сурталчилгааны 102 зөвшөөрлийг олгож, хуурамч стандартын бус 5 эмийн сэрэмжлүүлгийг олон нийтэд хүргэн, зах зээлээс 4 нэр төрлийн 72 цувралын дугаартай эмийг эргүүлэн татсан байна.

Энэ 2026 онд эм, эмнэлгийн хэрэгслийн тандалт, эмчилгээний идэвхид харьцуулсан судалгаа хийх, аж ахуйн нэгжүүдэд урьдчилан сэргийлэх хяналт шалтгалт, нэгдсэн худалдан авалтын процессыг сайжруулах зэрэг ажлуудыг хэрэгжүүлэхээр төлөвлөсөн талаар ЭЭХХЗГ-ын даргын албан үүргийг түр орлон гүйцэтгэгч П.Алтанцэцэг танилцуулав.

Эрүүл мэндийн сайд Ж.Чинбүрэн: Эрүүл мэндийн салбарын итгэлийг бий болгодог зүйл бол эмийн чанар болон бодит үнэтэй байх явдал. Үүнтэй холбоотой эм, эмнэлгийн хэрэгслийн тухай хууль шинэчлэгдэн батлагдаж хэрэгжиж байгааг ярианы эхэнд онцлов.

Монгол Улсын Засгийн газраас эмийн чанар ба үнийн тогтвортой байдлыг хангаж ажиллах бодлогыг барьж байгаа бөгөөд агентлагийн үйл ажиллагаа ч үүнтэй нягт уялдаатай байж илүү чанартай эмийг зах зээлд гаргах, үнийг бодитой буулгахад анхаарч ажиллах шаардлагатайг хэллээ.

Эмийн үнийг бодитой байлгах тал дээр ЭМЯ, ЭМХТ, ЭЭХХЗГ, СМТТ хамтран 2025 онд эмийн үнийг ил тод мэдээлэх https://em.hdc.gov.mn/ цахим системийг нэвтрүүлсэн. Уг системд 2600 гаруй эмийн үнийн мэдээллийг ил тодоор байршуулсан. Иймд цахим системд эмийн сан, шинээр бүртгэгдсэн эмийн үнийн мэдээллийг цаг алдахгүй нэмж оруулан, бүртгэлжүүлэхэд анхаарч ажиллахыг даалгав. Энэ онд "Агуулахын бүртгэлийн систем" хөгжүүлэлтийн ажлыг хийж байгаа юм. Уг систем ашиглалтад орсноор Эм, эмнэлгийн хэрэгслийн зохицуулалтын цахим тогтолцоо бүрдэнэ хэмээн үзэж байна.

Тэрбээр УИХ-аас барьж буй бодлого бол бизнес эрхлэгч нарт аль болох төвөггүй, чөдөр тушаа болохгүйгээр үйл ажиллагаа явуулах боломж нөхцөлийг бүрдүүлэх явдал тул аливаа тусгай зөвшөөрөл нь хялбар, харин үйл ажиллагаанд нь тавих хяналтаа сайжруулж, шаардлага хангахгүй бол цуцалдаг зарчим барьж ажиллахыг ЭЭХХЗГ-ын даргын албан үүргийг түр орлон гүйцэтгэгч П.Алтанцэцэгт үүрэг болгов.

Эмийн үнэ, чанарын асуудлыг шийдэхэд иргэдийн хяналт чухал тул уг цахим хуудсыг ашиглаж хэвшихийг иргэдэд уриалж байна. em.hdc.gov.mn болон e-barimt аппликэйшний Эрүүл мэнд цэснээс харах боломжтой.