Мөсөнд авиралтын залуучуудын дэлхийн аварга шалгаруулах тэмцээн Лихтенштейний Малбун хотод энэ сарын 29-нд хөшгөө нээнэ.

Тус тэмцээнд манай улсаас дасгалжуулагч Д.Отгонхүүгийн удирдлага дор гурван насны ангилалд найман тамирчин оролцохоор бэлтгэлээ базааж байна. Тодруулбал, U16 насны ангилалд А.Тэлмүүн, Б.Энхрий-Эрдэнэ, U18 насанд Ж.Мухаммед, П.Мөнхбаяр, U20 насанд А.Мөнхбилгүүн, Ж.Амина, Э.Дөлгөөн, А.Зоригтбаатар нар оролцохоор удахгүй буурал тивийг зорино.

Тэгвэл тэднийг өчигдөр МҮОХ-ны ерөнхийлөгч Б.Баттүшиг тэргүүтэн хүлээн авч уулзан, амжилт хүссэн байна. Уулзалтаар тамирчдын амжилт, олон улсын тэмцээнд оролцох нөхцөл байдлын талаар ярилцаж, мөсөнд авиралтын спорт нь 2030 оны өвлийн олимпын наадамд багтах боломж бүрдэж буйг онцолжээ. Тэмцээн гурван өдрийн турш хурд болон техникийн төрлөөр болно. Дээрх тамирчид хэдхэн хоногийн өмнө болсон улсын аварга шалгаруулах тэмцээнээс алт, мөнгө, хүрэл медаль хүртсэн юм.

Ташрамд дурдахад, олон улсын хэмжээний мастер О.Сайханжаргал, Н.Хэрлэн, Н.Сэлэнгэ тэргүүтэй манай насанд хүрэгчдийн шигшээ багийн тамирчид маргааш Швейцарын Саас-Фээ хотод болох Дэлхийн цомын хоёр дахь цуврал тэмцээнд оролцох гэж байна.