Монголын спортын наадмын хүрээнд хүндийг өргөлтийн насанд хүрэгчдийн улсын аварга шалгаруулах тэмцээн Монгол бөхийн өргөөнд эхэллээ.

Хоёр өдөр үргэлжлэх тус тэмцээнд Улаанбаатар хотын спорт хороо, клуб болон Орхон, Дархан-Уул, Хэнтий, Архангай аймгийн 120 гаруй тамирчин эрэгтэй, эмэгтэй тус бүр найман жингээр өрсөлдөж байна. Эрэгтэйчүүдийн 72, эмэгтэйчүүдийн 22 дахь удаагийн улсын аварга шалгаруулах тэмцээний салхийг хамгийн хөнгөн жингийн ангиллынхан хагалав. Тодруулбал, эмэгтэйчүүдийн 48 кг-ын жингээр тэмцээнийг эхлүүлсэн бөгөөд энэ жинд есөн тамирчин өрсөлдлөө. Улмаар олон улсын хэмжээний мастер Б.Тунгалаг огцмоор 52, огцмоор 61, нийлбэр дүнгээр 113 кг-ыг өргөснөөр УАШТ-д өсвөр, залуучууд, насанд хүрэгчдийн УАШТ-д найм дахь удаагаа түрүүлж байгаа юм.

Улсын дээд амжилтыг 52 удаа шинэчлэн тогтоосон тэрбээр шагналаа гардсаныхаа дараа “Улсын аваргадаа дахин түрүүлсэндээ баяртай байна. Уг нь бол спортоос түр завсарлага авсан. Гэхдээ УАШТ болох гэж байгааг сонсоод оролцохгүй байсан чадсангүй. Бэлтгэл муутай ч тэсэлгүй оролцлоо. Дүү нартайгаа өрсөлдөх сайхан байлаа. Тэд сайжирсан байна. Бүгдэд нь баяр хүргэж, улам их хичээгээрэй гэж хэлье” гэв. Энэ жинд хүрэл медалийг Хэнтий аймгийн тамирчин Х.Буянням, хүрлийг Дархан-Уул аймгийн тамирчин Х.Хулан нар хүртсэн юм.

Ташрамд сонирхуулахад, Монголын хүндийг өргөлтийн холбоо хурлаа хийж, шинэ бүтэц бүрэлдэхүүнтэй үйл ажиллагаагаа явуулж эхэлсэн байна. Тус холбооны ерөнхийлөгчөөр Б.Эрдэнэжаргалыг 2025 оны зургаадугаар сард сонгосон. Тэгвэл хэдхэн хоногийн өмнө тус холбооны гишүүдийн хурал болж, улмаар Удирдах зөвлөлийн хурлаараа олон улсын шүүгч Л.Одгэрэлийг ерөнхий нарийн бичгийн даргаар томилсон. Харин шигшээ багийн дасгалжуулагчаар Ч.Март, Г.Анужин нар ажиллахаар болжээ.