Африкийн цомын тэмцээний финалын тоглолтод Сенегалын шигшээ баг талбайн эзэн Мароккогийн багийг 1:0 харьцаагаар хожсоноор тивийн аваргаар хоёр дахь удаагаа шалгарлаа.

Тоглолт багагүй дуулиантай болж, II үеийн нэмэлт цагт дүрс бичлэгийг үзсэнийхээ дараа шүүгч Сенегалын багийн оруулсан гоолыг хүчингүй болгосон төдийгүй тус багийн хаалганд 11 м-ийн цохилт хийх шийдвэр гаргажээ. Сенегалын дасгалжуулагч Пап Тьяв үүнийг эрс эсэргүүцэн хөлбөмбөгчдөө талбайгаас авч гарсан байна.

Хэсэг хугацааны дараа Сенегалын шигшээгийн довтлогч Садио Мане багийнхандаа хандан, талбайд эргэн ирж тоглолтоо үргэлжлүүлэхийг уриалав. Тэрбээр хувцас солих өрөө рүү очиж, багийн нөхдөө дуудан авчирснаар 15 минутын дараа тоглолт дахин эхэлжээ.

Зураг дээр: Браим Диас 

Ингээд Мароккогийн хөлбөмбөгчин Браим Диас 11 м-ийн торгуулийн цохилтыг гүйцэтгэсэн боловч амжилтгүй болж, Сенегалын хаалгач Эдуар Менди бөмбөгийг барьж авч чадлаа. Удалгүй тоглолтын 94 дэх минутанд Пап Гейе гоол оруулснаар багаа ялалтад хүргэж, сенегалчууд түүхэндээ хоёр дахь удаагаа Африкийн цомыг хүртэхээр болов. Сенегалчууд өмнө нь 2021 онд тус тэмцээний аваргаар шалгарсан бол Мароккогийн шигшээ 50 жилийн өмнө цомыг хүртэж байжээ.

Мароккогийн шигшээ болон “Реал” багийн хагас хамгаалагч Браим Диас 5 гоол оруулснаар энэ удаагийн тэмцээний шилдэг мэргэн буучаар шалгарсан байна. Нигерийн шигшээгийн Виктор Осимхен, Египетийн довтлогч Мохамед Салах нар тус бүр 4 бөмбөг оруулжээ.  

Африкийн цомын дараагийн тэмцээн Кени, Танзани, Уганда улсуудад 2027, 2028 онуудад явагдана. 

 ТАСС