Италийн Милан, Кортина хотод болох өвлийн XXV наадамд оролцох Монголын гүйлтийн цанын тамирчид Европыг өчигдөр зорилоо.
Герман улсад бэлтгэл сургуулилалтаа хийж эхэлсэн тэд Оберхофф хотод энэ сарын 17, 18-нд болох Дэлхийн цомын гараанд уралдах юм. Тус уралдааныг сонгодог 10 км болон спринт зайд зохион байгуулна. Олон улсын хэмжээний мастер Б.Ачбадрах, Э.Ариунтунгалаг нарын хувьд тус тэмцээнд оролцсоны дараа шууд Италийг зорьж, олимпын бэлтгэлдээ орохоор төлөвлөжээ.
Тэгвэл уулын цанын төрөлд эрх авсан олон улсын хэмжээний мастер А.Ариунбат өдгөө “Скай резорт” цанын баазад бэлтгэлээ базааж байгаа бөгөөд Европыг энэ сарын 18-нд зорих нь ээ.
Ташрамд дурдахад, манай гүйлтийн цанын тамирчид скиатлон, спринт, 10 км гэсэн гурван зайд хоёрдугаар сарын 7-ноос эхлэн уралдана. Харин А.Ариунбатын тухайд уулын цанын слалом төрөлд хоёрдугаар сарын 16-нд өрсөлдөх юм.
