Тамирчин хүний тэсвэр тэвчээр, ур чадвар, хатуужил, шандасыг сорьж буй алдарт “Дакар ралли” уралдааны 10 дахь гараанд гарсан тамирчид бариандаа орлоо.
Марафоны хоёр дахь өдрийн гараа гэдгээрээ онцлогтой тус уралдаан мотоцикль, автомашины, тамирчдын хувьд хүнд болж өнгөрчээ. Олон тамирчин машин, мотоцикльтойгоо онхолдож, бэртсэн бөгөөд зарим нь уралдаанаа дуусгаж чадалгүй замаас гарсан байна. Энэ хүнд хэцүү замын нөхцөл манай Э.Халиунболд гавьяатыг ч тойрсонгүй. Тэрбээр элсэн манхантай замд унаж хэмнэлээ бага зэрэг алдсан ч эргээд уралдаанаа үргэжилүүлж амжилттай бариандаа орсон гэх мэдээг “Тал нутгаас Дакарт” төслийн багаас ирүүлэв. Энэ өдөр гавьяат тамирчин Э.Халиунболд 4 цаг 54 минут 25 секундээр нийт тамирчидаас 20, Ралли-2 төрөлдөө 11 дүгээр бариалсан байна. Хэрвээ унаагүй бол үүнээс ч өмнө бариалах боломж байжээ. Түүний хувьд барианд орсныхоо дараа “Марафоны эхний өдөр хүмүүс их төөрсөн. Би түүнийг нь ашиглаж, дажгүй яваад барианд орлоо. Хурдны торгууль авсан. Харин өнөөдрийн элс ёстой жинхэнэ хүч, тэвчээр шалгасан даа. Дакарт уралдсанаас хойш анх удаа их хэмжээний хөлс асгарууллаа. Нэлээд нисэлттэй унасан. Үүнээс болж явж чадахгүй нэлээд ядарсан байна. Багагүй суусан. Шатахуунаа цэнэглэснээс хойш сайн явлаа. Ямартай ч марафон гарааг дажгүй сайн дуусгасандаа баяртай байна” гэв.
Харин олон улсын хэмжээний мастер П.Мөрөн 5 цаг 00 минут 44 секундээр нийт тамирчидаас 25, Ралли-2 ангилалдаа 16 дугаар байрт оржээ. Тэрбээр “Энэ өдрүүдийг туулсандаа итгэж чадахгүй байна. 10 гараа уралдаж бариалсандаа маш их баяртай байна. Аав, ээж, эмээ, өвөө болон миний төлөө санаа зовж, сэтгэл чилээж байсан хүмүүсдээ баярлалаа. Бид илүү их хичээх болно” хэмээн ярилаа.
Өчигдрийн гарааг Францын тамирчин Беверен тэргүүлж болсон Америкийн Брэйбек, Аргентиний Бенавайдес нар удаалав.
Өнөөдөр уралдааны 11 дэх өдөр. Бишагаас Аль-Хенакиях хотын зүг хүлгийн жолоо зална. Нийт замын урт 882 км бөгөөд үүнээс уралдааны цаг тооцох нь 346 км байх аж. 11 дэх гарааны замын нөхцөл байдлаас дурьдвал 83 хувь нь хатуу хөрс, 7.0 хувь нь элсэн манхан, 10 хувь нь хадархаг замтай нүүр тулах нь ээ.
