2010 оны дэлхийн аварга Альваро Арбелоа Испанийн хөл бөмбөгийн “Реал” клубийн ахлах дасгалжуулагчаар томилогдсон тухай тус клубийн хэвлэлийн алба мэдээлжээ.

Харин өдгөө 42 настай испани мэргэжилтэнтэй байгуулсан гэрээний талаар дэлгэрэнгүй мэдээлэл өгсөнгүй.

Арбелоа 18 наснаасаа (2001 онд) “Реал”-ын залуучуудын багаас хөлбөмбөгчний замналаа эхлүүлжээ. 2006 онд тэрбээр “Депортиво” баг руу шилжсэн бол 2007 оны өвөл Английн “Ливерпүүл” клуб түүнийг худалдан авсан бөгөөд тэрбээр хоёр жил хагасын хугацаанд тус багт тоглосон байна. 2009 онд Арбелоа “Реал”-д буцаж иржээ. 2016 оны зун нэг жилийн хугацаатай гэрээг Английн “Вест Хэм”-тэй байгуулж байв. 

“Реал”-ын бүрэлдэхүүнд Арбелоа  Аваргуудын лигт хоёр удаа (2013/14, 2015/16), Испанийн аварга шалгаруулах тэмцээнд мөн хоёр удаа (2011/12) түрүүлж, Испанийн цомыг (2010/11, 2013/14) хүртэж байжээ. Мөн Испанийн супер цом (2012), УЕФА-гийн Супер цом (2014) болон клубүүдийн дэлхийн аваргад (2014) түрүүлсэн байна. Испанийн шигшээ багт 2008-2013 онд хамгаалагчаар тоглож, 58 тоглолтод оролцохдоо дэлхийн аваргаар (2010) шалгарч, Европын аварга шалгаруулах тэмцээнд (2008, 2012) хоёр удаа түрүүлж байв.

2020 оноос Арбелоа “Реал” клубийн янз бүрийн насны багуудыг дасгалжуулж байгаа бөгөөд 2025 онд залуучуудын багийг удирдаж эхэлсэн байна.

Одоогийн байдлаар “Реал” баг Испанийн аварга шалгаруулах тэмцээний 19 тойргийн дараах байдлаар 45 оноотойгоор хүснэгтийн хоёрдугаар байрт бичигдэж байна. Харин Аваргуудын лигт 12 оноогоор 7 дугаар байрт явж байгаа бөгөөд хоёр тоглолт хийх дутуу байна. Арбелоагийн удирдлага дор тус баг анхны тоглолтоо нэгдүгээр сарын 14-нд хийнэ. Тодруулбал “Реал” Испанийн цомын 1/8 шигшээд “Альбасете” багийн талбайд тоглоно.

Эх сурвалж: TASS