Монголын үндэсний сагсан бөмбөгийн холбооны эмэгтэйчүүдийн дээд лигийн улирлын тоглолт дуусаж, плей-офф эхэлсэн. Тэгвэл өнөөдөр улирлын шилдгүүдэд шагнал гардуулах ёслол болов.

2025-2026 оны улирлын “Үнэ цэнтэй тоглогч”-оор “Улаанбаатар Амазонс” багийн тоглогч Б.Болор-Эрдэнэ тодорлоо. Түүний хүчин зүтгэж байгаа “Улаанбаатар Амазонс” улирлыг 15-0 гэсэн амжилттай дуусгасан бөгөөд Б.Болор-Эрдэнэ 14.8 оноо, 9.3 самбар, 2.0 оновчтой дамжуулалт, 1.0 хаалт, 1.4 бөмбөг таслалт гэсэн статистик үзүүлсэн бөгөөд 52 хувьтай довтолжээ.

Тэрбээр шагналаа гардсаныхаа дараа “Сэтгэл маш их хөдөллөө. Дөрөв дэх жилдээ “Үнэ цэнтэй тоглогч”-ийн шагналд өрсөлдсөний эцэст гардаж авлаа. Сагсан бөмбөгийн спортоор хичээллэсэн 15 жилийн минь хөдөлмөрийн үр шим гарч байна. Үүнээс сүүлийн найман жилд зөвхөн сагсан бөмбөгтөө анхаарлаа хандуулж, бэлтгэлээ хийсээр ирлээ. Энэ шагналыг авахад арыг нь дааж байсан хайртай хань болон гэрийн бүлийнхэн, багш нартаа, багийнхандаа баярласнаа илэрхийлье. Шагналаа авахдаа хайртай аав, ээжийгээ бодлоо. Охиноороо маш их бахархаж байгаа байх” хэмээн сэтгэгдлээ хуваалцав. Харин “Улаанбаатар Амазонс”-ын дасгалжуулагч Хавиер Гарсия хоёр жил дараалан “Шилдэг дасгалжуулагч”-ийн шагнал хүртлээ. Ингэснээр энэхүү шагналыг дараалан хүртсэн анхны дасгалжуулагч болов.

Бусад шилдгийг танилцуулъя.

Шилдэг шинэ тоглогч: Н.Алтай (Аодэ Винкс)

Шилдэг хамгаалан тоглогч: Т.Үлэмж (Пайретс)

Шилдэг олон улсын тоглогч: Жаклин Карман (Аравт)

Шилдэг 6 дахь тоглогч: М.Даваахүү (Этүгэн Ирвэсүүд)

Шилдэг амжилт нь ахисан тоглогч: М.Булбул (Пайретс)