Тив дэлхийн тавцнаа эх орныхоо нэрийг дуурсган олон залуу тамирчдыг араасаа дагуулсан олон улсын шатрын их мастер, Монгол Улсын гавьяат тамирчин А.Энхтуулд хүндэтгэл илэрхийлж, хоёр өрөө байраар мялаалаа.
Өнөөдөр Сэлэнгэ аймгийн Засаг дарга Н.Лхагвадорж болон "Халада" группийн зүгээс Алтанбулаг суманд шинээр ашиглалтад орсон 60 айлын орон сууцнаас 2 өрөө байрыг нутгийн гавьяатдаа өглөө.
Тэрбээр 22 жилийн турш шатрын спортоор хичээллэж, нутаг орныхоо нэрийг тив дэлхийд гаргаж яваа юм. Тиймээс түүний энэхүү амжилтыг төр засгаас өндрөөр үнэлж, 2025 онд Монгол Улсын гавьяат тамирчин цол тэмдгээр шагнасан.
Шатрын их мастер, Монгол Улсын гавьяат тамирчин А.Энхтуул Сэлэнгэ аймгийн Алтанбулаг сумын уугуул бөгөөд сүүлийн жилүүдэд Сэлэнгэ аймгийн хүүхэд, залуучуудад шатрын спортыг сурталчлан таниулах, хичээллэх, амжилт гаргахад нь хөтөч болж яваа юм.
