Хятадын Сычуань мужийн Лужоу хотод холимог тулааны насанд хүрэгчдийн Азийн аварга шалгаруулах тэмцээн болж, манай улсын тамирчид зургаан медаль хүртсэн байна.

Азийн 30 гаруй орны тамирчид оролцсон энэхүү тэмцээнээс эрэгтэйчүүдийн 96 кг-д Э.Мөнгөншагай, 120 кг-д Э.Үнэнхүү нар мөнгөн медалиар энгэрээ мялаав. Э.Мөнгөншагайгийн хувьд өнгөрсөн жил Камбожоос алтан медаль хүртэж, төрийн дууллаа эгшиглүүлж байсан юм. Харин энэ удаа дахин финалдсан ч мөнгө дээр буулаа. Ингэснээр Азийн аваргын хошой медальтан болов.

Тэгвэл эмэгтэйчүүдийн 49 кг-д Н.Энхжин, эрэгтэйчүүдийн 65 кг-д А.Адъяа, 77 кг-д Б.Пүрэвбаатар, 85 кг-д А.Дашням нар хүрэл медаль хүртэж, төрийн далбаагаа Лужоугийн тэнгэрт мандууллаа. Монголчууд энэ удаагийн тивийн аваргад 14 тамирчнаа илгээснээс зургаа нь медальтай эх орондоо ирж байна.

Азийн холимог тулааны холбооноос зохион байгуулж буй энэхүү тэмцээнээс “Аичи Нагоя-2026” Азийн зуны спортын XX наадам болон “Рияд 2026” “Азийн танхимын болон тулааны спортын VI наадамд оролцох эрхийг олгосноороо онцлогтой юм.