, 2026 оны нэгдүгээр сарын 12Үндсэн хуулийн өдрийг угтаж УИХ-ын даргын ивээл дор зохион байгуулдаг Шатар сонирхогчдын улсын аварга шалгаруулах 14 дэх удаагийн тэмцээний шувтаргын тоглолт Төрийн ордонд хоёр өдөр үргэлжилж, аваргуудаа тодрууллаа.
Энэ удаагийн тэмцээнд 21 аймаг, нийслэлээс нийт 4922 тамирчин оролцсоноос шигшээ тоглолтод сум, дүүрэг, аймаг, нийслэлээс шалгарсан эрэгтэй 108, эмэгтэй 40 шатарчин оюун ухаанаа сорин өрсөлдөв. Швейцарь системээр найман өрөг тоглосон тус тэмцээнд эрэгтэйчүүдийн ангилалд Баянзүрх дүүргээс шалгарсан оролцогч Б.Гантулга 7.5 оноогоор тэргүүлж, удаах байрт Сэлэнгэ аймгийн оролцогч Ж.Пүрэвдорж /7.0/, гуравдугаар байрт Дорноговь аймгийн оролцогч Г.Баттүвшин /7.0/ тус тус шалгарав.
Эмэгтэйчүүдийн ангилалд Говь-Сүмбэр аймгаас шалгарсан оролцогч А.Энхдэлгэр 8.0 оноогоор нэгдүгээр байр, Орхон аймгаас шалгарсан оролцогч Д.Жаргалсайхан 6.0 оноогоор хоёрдугаар байр, нийслэлээс шалгарсан оролцогч Д.Булгантамир 6.0 оноогоор гуравдугаар байр эзлэв. Тэмцээний V-VI байрын шагналыг эрэгтэйчүүдээс нийслэлийн оролцогч Г.Цолмон-Осор /6.5 оноо/, Хэнтий аймгийн оролцогч Э.Банзрагч /6.0 оноо/, Баянгол дүүргийн оролцогч Ш.Энхбат /6.0 оноо/ нар, эмэгтэйчүүдээс Хан-Уул дүүргийн оролцогч Т.Ариунзаяа /5.5 оноо/, Баянзүрх дүүргийн оролцогч Г.Маралгуа /5.5 оноо/, мөн дүүргийн оролцогч Б.Энхдэлгэр /5.5 оноо/ хүртэв.
Түүнчлэн тэмцээний эрэгтэйчүүдийн 70-аас дээш насны ангилалд Г.Оюунбаяр, 60-аас дээш насны ангилалд Ш.Ганболд, 55-аас дээш насны ангилалд А.Зоригтбаатар, чансаа нь 1700 хүртэлх онооны ангилалд Б.Оргил, чансаагүй оролцогчдын ангилалд Б.Амарзаяа, эмэгтэйчүүдийн 55-аас дээш насны ангилалд Г.Оюунжаргал, чансаагүй оролцогчдын ангилалд Э.Болор-Эрдэнэ, Ц.Нармандах нар тус тус тусгай шагнал хүртлээ. Монголын шатрын холбооноос олгодог "Оюунлаг түшээ” батламжийг УИХ-ын гишүүн асан Ц.Оюунбаатар /4.5 оноо/, УИХ-ын гишүүн О.Амгаланбаатар /4.0 оноо/ нарт гардуулсан юм.
Шатар сонирхогчдын улсын аварга шалгаруулах 14 дэх тэмцээний эхний гурван байрт шалгарч, медаль хүртсэн тамирчид спортын дэд мастер цолны болзол хангаж буй бөгөөд ардчилсан Үндсэн хуулийн ойн өдөр үнэмлэх, тэмдгээ гардана.
