Оросын теннисчин Даниил Медведев Австралийн Брисбен хотноо болсон ATP 250 ангиллын тэмцээнд түрүүллээ.
800 мянган долларын шагналын сантай тус тэмцээний финалд дэлхийн чансааны 13 дугаарт бичигдэж буй Медведев чансааны 33 дугаарт байгаа АНУ-ын теннисчин Брэндон Накашимаг 6:2, 7:6 (7:1) харьцаагаар хожжээ. Ингэснээр хоёр тамирчны тоглолтын харьцаа 3:0 боллоо. Тоглолт 1 цаг 35 минут үргэлжилсэн байна.
Өдгөө 29 настай Медведевийн хувьд энэ нь түүний тамирчны замнал дахь ганцаарчилсан төрлөөр авсан 22 дахь удаагийн түрүү юм. Тэрбээр 2025 оны 10 дугаар сард Алма-Аты хотод болсон ATP 250 ангиллын тэмцээнд түрүүлснээсээ хойш анх удаагаа аваргаллаа. Дараагийн долоо хоногт Мэргэжлийн теннисчдийн холбооны /ATP/ шинэчилсэн чансаагаар Оросын теннисчин 12 дугаар байр руу дэвшинэ.
Мөн өнгөрсөн өдрүүдэд Брисбенд болсон эмэгтэй теннисчдийн WTA 500 ангиллын тэмцээнд дэлхийн чансааг тэргүүлж буй Беларусийн тамирчин Арина Соболенко тэргүүн байрыг эзэллээ. 1,7 сая долларын шагналын сантай уг тэмцээний финалын тоглолтод тэрбээр Украины теннисчин Марта Костюкийг 6:4, 6:3 харьцаагаар хожсон байна. Тоглолт 1 цаг 18 минут үргэлжилжээ.
Өдгөө 27 настай Соболенко Брисбений тэмцээнд хоёр дараалан түрүүлж байгаа нь энэ бөгөөд тэрбээр Эмэгтэй теннисчдийн холбооноос /WTA/ зохион байгуулдаг тэмцээнүүдэд 22 дахь удаагаа аваргаллаа.
Эх сурвалж: РИА Новости/



