Өвлийн олимпын XXV наадам Итали улсын Милан болон Кортина хотод хоёрдугаар сарын 6-22-нд болно.
Батлан хамгаалах яамны мэдээлснээр, Монгол Улсаас “Милан Кортина 2026” өвлийн олимпын наадамд гүйлтийн цанын төрөлд Зэвсэгт хүчний 011 дүгээр ангийн соёл, спортын төвийн дарга, ОУХМ, дэслэгч Э.Ариунтунгалаг, ОУХМ Б.Ачбадрах, уулын цанын төрөлд А.Ариунбат нар оролцох болзлоо хангаад байгаа аж.
“Милан Кортина 2026” өвлийн олимпын наадамд дэлхийн 90 гаруй орны 3500 орчим тамирчид спортын 16 төрөлд, 116 багц медалийн төлөө хурд хүч, авхаалж самбаагаа сорин өрсөлдөнө.
Монгол Улс анх “Инсбрук 1964” өвлийн олимпын наадамд оролцсоноос хойш өнөөдрийг хүртэл 15 удаагийн өвлийн олимпын наадамд гүйлтийн цана, биатлон, шорт трек, гүйлтийн тэшүүрийн төрлөөр тамирчдаа оролцуулж ирсэн түүхтэй юм.
Энэхүү наадам нь түүхэнд хоёр хот албан ёсоор хамтран тэмцээн зохион байгуулахаас гадна 1984 оны Сараевогийн наадмаас хойш нээлт, хаалтын ёслолыг тусдаа газарт зохион байгуулах анхны өвлийн олимпын наадам болохоороо онцлогтой.
