Сонгомол, чөлөөт бөхийн насанд хүрэгчдийн улсын аварга шалгаруулах тэмцээн Спортын төв ордонд эхэллээ.

Дөрвөн өдөр үргэлжлэх тус тэмцээнийг 1980 оны Москвагийн зуны XXII олимпын их наадмын мөнгөн медальт, Монгол Улсын гавьяат тамирчин, нэрт бөх Ж.Даваажавын нэрэмжит болгосноороо онцлогтой. Ингэснээрээ Ж.Даваажавын Монголын бөхийн хөгжилд оруулсан үнэтэй хувь нэмэр, спортын түүхэнд үлдээсэн гавьяа зүтгэлийг хойч үедээ мөнхжүүлж байгаа ажээ.

Тэмцээний эхний өдөр буюу өчигдөр сонгомол бөхийн медальтнууд тодорлоо. Сонгомол бөхийн УАШТ-ийг олимпын зургаан жингээр зохион байгуулсан бөгөөд 90 орчим тамирчин өрсөлджээ. 60 кг-д М.Даваабанди, 87 кг-д Г.Төрболд нар хоёр дахь удаагаа түрүүлсэн. Харин 67 кг-д Ц.Отгоннасан, 77 кг-д Б.Ууганбаяр, 97 кг-д Г.Ганхуяг, 130 кг-д Б.Намбардагва нар улсын аваргаас анхны алтан медалиа хүртсэн байна. Багийн дүнгээр олон улсын хэмжээний мастер С.Мөнхсүх дасгалжуулагчтай “Цаст тайга” клуб 96 оноогоор тэргүүлж, гавьяат тамирчин Г.Мандахнаран дасгалжуулагчтай “Алдар” спорт хороо, С.Мөнхдуулдах дасгалжуулагчтай Баянхонгор аймгийн “Байдрагийн хүчтэн” дэвжээ удаалжээ.

Тэгвэл өнөөдөр чөлөөт бөхийн эрэгтэйчүүдийн 57, 61, 65, эмэгтэйчүүдийн 53, 62, 76 кг-ын жингийн барилдаан болж, медальтнууд тодорно. Энэ жилийн чөлөөт бөхийн тэмцээнд 250 орчим тамирчин өрсөлдөж байна. Энэхүү тэмцээн нь зөвхөн улсын аваргуудыг тодруулах төдийгүй Монголын шигшээ багийн бүрэлдэхүүн болон чөлөөт, сонгомол бөхийн хөгжлийн чиг хандлагыг тодорхойлох ач холбогдолтой юм.

Гэрэл зургуудыг Б.Чадраабал