Парисын "Пари Сен-Жермен" баг Кувейтэд болсон Францын Супер цомын тэмцээний финалын тоглолтод “Марсель” багийг торгуулийн цохилтоор хожлоо.
Тоглолтын үндсэн цаг 2:2 харьцаагаар дууссан байна. Парисын клубээс Усман Дембеле /13 дахь минут/, Гонсалу Рамуш /90+5/ нар гоол оруулжээ. 74 дэх минутанд ПСЖ-ийн хаалгач Люка Шевалье торгуулийн талбайд Мэйсон Гринвүүдийг унагасан тул шүүгч пенальти зааж, Гринвүүд 11 м-ийн цохилтыг амжилттай гүйцэтгэлээ. Тоглолтын 87 дахь минутанд ПСЖ-ийн Вильян Пач багийнхаа хаалганд авто гоол оруулснаар тооны харьцаа 2:2 болжээ. Нэмэлт цагт гоол ороогүй тул торгуулийн цохилтоор ялагчийг тодруулахад ПСЖ 4:1 харьцаагаар илт давамгайллаа.
“ПСЖ”-ийн орос хаалгач Матвей Сафоновын зүүн гарын яс хугарсан тул энэ удаагийн тоглолтод оролцсонгүй. Тэрбээр Тив хоорондын цомын тэмцээний финалд Бразилын “Фламенго” тоглож байх үедээ гэмтэл авсан юм. Энэ тоглолтод Сафонов 11 м-ийн 4 цохилтыг дараалан хаасан билээ.
Ийнхүү “Марсель”-ийг хожсоноор ПСЖ баг хамгийн олон буюу түүхэндээ 14 дэх удаагаа, мөн 4 удаа дараалан Францын Супер цомыг өргөлөө. Хоёрдугаарт бичигдэж буй “Лион” уг цомыг 8 удаа хүртсэн байна.
Супер цомын тэмцээнд Францын аварга болсон баг болон Францын цомын тэмцээнд түрүүлсэн баг оролцдог. Өнгөрсөн улиралд ПСЖ хоёуланд нь аваргалсан тул Францын АШТ-нд хоёрдугаар байр эзэлсэн “Марсель” баг Супер цомд оролцсон юм. Марсельчууд өмнө нь уг цомыг 3 удаа хүртжээ.
Эх сурвалж: РИА Новости
