Хөвсгөл аймгийн Нэгдсэн эмнэлэг "Эрүүл монгол хүн" хөтөлбөрийн хүрээнд хавдрын тусламж үйлчилгээг орон нутагтаа цогцоор нь үзүүлж байна.

Нэгдсэн эмнэлгийн Мэс засал, ариутгалын тасагт өнгөрсөн онд 1827 өвчтөн хэвтэн эмчлүүлж, 715 өвчтөнд төлөвлөгөөт болон яаралтай мэс засал хийж 400 орчим хүнд мэс ажилбарын тусламж үйлчилгээ үзүүлсэн байна.

2021 оноос эхлэн орон нутагт хавдрын мэс мэс заслыг нутагшуулж орон нутагтаа бие даан ходоодны хорт хавдрын үед ходоод бүтэн авах, ходоодны эрт үеийн хорт хавдрын үед дурангаар салст хуулах, хэвлийн дурангаар ходоодны гарах хэсгийг тайрах, тунгалгийн булчирхай түүх, залгалт хийх, элэгний хавдрын, бөөрний хорт хавдрын, хөхний хавдрын, давсагны хорт хавдрын нийт 100 гаруй мэс заслыг амжилттай хийсэн байна.

Мэс заслын тасаг жилд дунджаар хавдрын 30 гаруй мэс засал орон нутагтаа бие даан хийж байна.

Хөвсгөл аймагт хавдрын мэс заслын тусламж үйлчилгээний хүртээмжийг нэмэгдүүлэх зорилгоор ХСҮТ-өөс эмч нар гэр бүлээрээ Хөвсгөл аймагт ирж 2021 оноос эхлэн хавдрын мэс заслыг орон нутагт амжилттай хийж эхэлсэн.

Тухайлбал, ХСҮТ-ийн хавдрын мэс заслын эмч Б.Түвшин, цээжний хөндийн мэс засалч, хавдар судлаач эмч Л.Хануй, элэг цөс, нойр булчирхайн мэс заслын эмч О.Дамдинсүрэн, ерөнхий мэс заслын эмч Г.Гантогтох, Хөхний төвийн мэс заслын эмч Б.Одбаяр нар Хөвсгөл аймагт ажиллах хугацаандаа хавдрын 45 мэс заслыг амжилттай хийж, мэс заслын ур чадварыг нутагшуулж, хавдрын мэс заслыг цогцоор нь хийхээр зорин ажилласан нь ийнхүү үр дүнгээ өгч байна гэдгийг Мэс засал, ариутгалын тасгийн эрхлэгч Г.Чимэддорж ярилаа.