Одоогоос 10 жилийн өмнө Рио де Жанейро хотод болсон олимпын наадамд гялалзаж, жүдо бөхийн 90 кг-ын жинд түрүүлсэн Японы шилдэг жүдоч Машү Бакер Монголд ирлээ.
Тэрбээр дархан аварга Н.Батсуурийн урилгаар манай улсад ирж байгаа бөгөөд Монголын жүдо бөхийн холбоотой хамтран Увс аймагт зохион байгуулах өсвөрийн жүдочдод долоо хоногийн сургалт зохион байгуулах аж. Сургалтын үеэр олимп, дэлхийн дэвжээнээс хуримтлуулсан үнэтэй туршлага, техник, барилдааны ухаанаасаа хуваалцан, ирээдүйн шилдэг тамирчдыг бэлтгэхэд хувь нэмрээ оруулах юм. Энэхүү сургалт нь орон нутгийн жүдоч хүүхэд, залуусын ур чадварыг ахиулах, олон улсын жишигт ойртуулан хөгжүүлэхэд чухал ач холбогдолтой. Машү Бакер аварга Увс аймгийг өнөөдөр зорьсон бөгөөд долоо хоног орон нутгийн жүдочдод сургалт явуулна. Дараа нь Улаанбаатарт ирж, “Алдар” спорт хороонд болох өсвөрийн жүдочдын нээлттэй тэмцээний нээлтэд оролцоод энэ сарын 15-нд буцах ажээ.
Өдгөө 31 настай Машү Бакер аварга “Рио-2016” олимпод түрүүлж, 2015 оны ДАШТ, 2018 оны Азийн наадмаас тус тус хүрэл медаль хүртсэн юм. Мөн Мастерс, “Их дуулга”, гранпри ангиллын тэмцээнээс зургаан алт, нэг мөнгө, гурван хүрэл медаль хүртсэн байна.
