Завхан аймагт шинэ оны эхний нарыг харах "Оргилоос эхэлсэн-2026 он" нэртэй уулын авиралтад 150 гаруй хүн оролцжээ.
Уулын авиралт, алхалтад оролцогчид Товцог хайрхны 2500 метрийн оргилд итгэл, хүслээ тээж цугларлаа. Шинэ оны нарны анхны нар мандан гарах тэр мөчид оролцогчид цай, сүү, будаа, идээнийхээ дээжийг эх дэлхий, хангай ууландаа өргөн, буян хишиг, аз хийморь, сайн сайхныг даатгав.
Шинэ оны анхны алхалтад 2025 онд уулын спортын “Дөрвөн бэрх” цолны болзол хангасан уулчид болох Европ тивийн ноён оргилд амжилттай гарсан Ө.Батманлай /ОУХМ/, M.Пүрэв, С.Болор-Эрдэнэ нар оролцож уулын спортоор сонирхон хичээллэж байгаа иргэдэд уулын спортын талаарх сонирхолтой мэдээллийг өглөө.
Энэ удаагийн уулын алхалт, авиралтад аймаг, сумын ЗДТГ, аймгийн Биеийн тамир спортын хороо, Дэвшил сургууль, Цагдаагийн газар, Онцгой байдлын газар, Зэвсэгт хүчний 325-р анги, Спорт цогцолбор зэрэг байгууллагын ажилтнууд иргэд оролцлоо. Шинэ оны анхны нарыг оргилоос угтаж, итгэл мөрөөдлөө өндөрт өргөсөн хүн бүрийн зам өгсөх тусам гэрэлтэй, өглөө бүр нь нарлаг, өгсүүр бүхний цаана оргил угтах болтугай хэмээн аймгийн Биеийн тамир спортын хорооноос мэдээлэв.
Ташрамд, Завхан аймгийн 24 суманд гэр бүлээрээ, ажлын хамт олон, найз нөхөдтэйгээ баг болж жилийн дөрвөн улиралд тогтмол алхдаг 160 гаруй иргэн бий.
