Испанийн “Реал” багт тоглодог Францын довтлогч Килиан Мбаппе өвдөгний холбоос сунасан гэх оноштойгоор наад зах нь гурван долоо хоногийн турш талбайд гарах боломжгүй болжээ. Энэ тухай L'Equipe сонинд мэдээлсэн байна.
Томографын шинжилгээгээр, өвдөгний чагтан холбоос бус харин гаднах холбоос гэмтсэн тул эмчлүүлж, амрах хэрэгтэй болжээ. Тэрбээр сүүлийн хэд хэдэн тоглолтын үеэр зовиурласан харагдаж байв.
L'Equipe сонинд бичсэнээр, Мбаппе 4-нд болох Ла Лигийн “Бетис” багтай хийх тоглолт, 8-нд болох Испаний Супер цомын хагас шигшээ тоглолт, “Атлетико”-г хожсон тохиолдолд 11-нд болох финалын тоглолтод оролцох боломжгүй. Түүнчлэн Испанийн аварга шалгаруулах тэмцээний “Леванте” багтай 17-нд хийх тоглолт, Аваргуудын лигийн тэмцээний “Монако” багтай 20-нд хийх тоглолтыг тус тус өнжинө.
Мбаппе “Реал” багт 2024 оны зунаас хойш тоглож байгаа бөгөөд одоогийн байдлаар 83 тоглолтод оролцохдоо 73 гоол оруулж, 10 оновчтой дамжуулалт өгөөд байна.
2018 оны дэлхийн аварга, 2022 оны ДАШТ-ий мөнгөн медальт тэрбээр “Реал”-тай 2029 оны зургаадугаар сар хүртэл гэрээ байгуулжээ.
Эх сурвалж: championat.com
