Катарын нийслэл Доха хотод болсон шатрын түргэн тоглолтын дэлхийн аварга шалгаруулах тэмцээнд /ДАШТ/ Норвегийн их мастер, 16 дахь удаагийн дэлхийн аварга Магнус Карлсен түрүүллээ.

Норвегийн шатарчин 13 тойргийн дараа 10.5 оноо авснаар тэмцээнийг тэргүүлсэн бол Оросын их мастер Владислав Артемьев 9.5 оноотойгоор дэд байр эзэлжээ. Гуравдугаар байрт Энэтхэгийн их мастер Аржун Эригайси орлоо. Тэрбээр мөн 9.5 оноотой байсан боловч нэмэлт үзүүлэлтээр Артемьеваас дутсан байна.

Карлсены хувьд түргэн болон блиц тоглолтын ДАШТ-д зургаа дахь удаагаа аваргаллаа. Өмнө нь тэрбээр 2014, 2015, 2019, 2022, 2023 онуудад түрүүлж байсан юм.

Блиц төрлийн ДАШТ 12 дугаар сарын 29, 30-нд болно.

Эмэгтэйчүүдийн тэмцээнд Оросын шатарчин Александо Горячинка дэлхийн аварга болжээ. Тэрбээр тай-брейк буюу богиносгосон цагт Хятадын шатарчин Жү Жинэрийг 1.5:0.5 харьцаагаар хожсон байна.

Үндсэн тэмцээний 11 тойргийн дараа хоёр тамирчин хоёул 8.5 оноо авчээ. Өнгөрсөн оны аварга Энэтхэгийн шатарчин Хампи Конеру мөн адил 8.5 оноотой байв. Гэсэн хэдий ч нэмэлт үзүүлэлтээр Горячкина, Жү Жинэр эхний хоёр байрыг эзэлж, тай-брейкээр ялагчийг тодруулсан юм.

Конеру сүүлчийн тоглолтод нутаг нэг шатарчин Савита Шри Баскартай тоглохдоо илт давуу байсан боловч хожилд хүргэх цорын ганц нүүдлийг олж харж чадаагүй тул тоглолт тэнцээгээр дууссан байна.

Эх сурвалж: TASS