Шинэ он солигдмогц зохион байгуулдаг хамгийн эхний тэмцээн нь чөлөөтийн бөхийн насанд хүрэгчдийн УАШТ байдаг.
Тэгвэл энэ уламжлалын дагуу Монголын чөлөөт бөхийн холбооноос насанд хүрэгчдийн улсын аварга шалгаруулах тэмцээнийг 2026 оны нэгдүгээр сарын 8-11-нд Улаанбаатар хотын Спортын төв ордонд зохион байгуулахаар товложээ. Хуваарийн дагуу нэгдүгээр сарын 8-нд сонгомол, 9-11-нд чөлөөт бөхийн УАШТ болно. Тэмцээнийг эрэгтэй, эмэгтэй тус бүр 10, сонгомол бөхийн 60, 67, 77, 87, 97, +130 кг-ын жингийн ангиллаар явуулах аж.
УАШТ-д оролцох баг, тамирчдын эцсийн мэдүүлгийг ирэх сарын 7-ныг хүртэл авах бөгөөд тухайн өдөр жингийн сугалаатай. Энэхүү тэмцээн нь дотоодын чансааг тогтоож, дараагийн шатны тэмцээнд эх орноо төлөөлөн оролцох тамирчдыг шалгаруулах зорилготой юм.
Ташрамд дурдахад, УАШТ-ий дараа манай тамирчдын оролцох эхний олон улсын тэмцээн нь Иван Ярыгины нэрэмжит гранпри байх юм. Тус тэмцээн нэгдүгээр сарын 28-нд ОХУ-ын Красноярск хотод эхэлнэ.
