2025 онд олимп, паралимпын наадам, дэлхийн аварга шалгаруулах тэмцээн (олимп, паралимпын зай, жин, төрөл)-ээс медаль хүртсэн 11 спортын 78 тамирчинд сар бүрийн мөнгөн урамшуулалд олгожээ.

Үүнээс хамгийн өндөр буюу 14 сая төгрөгийг нэг тамирчинд сар бүр олгож байна. Харин хамгийн бага буюу 500 мянган төгрөгийг 22 тамирчинд сар бүр олгов.

Тэгвэл Монгол Улсын шигшээ багийн тамирчид 2025 онд долоон спортын дэлхийн аварга шалгаруулах тэмцээн (олимп, паралимпын наадмын хөтөлбөрт багтсан спортын төрөл, жин, зай)-ээс нийт 11 медаль хүртлээ. Тодруулбал, чөлөөт бөхийн төрөлд П.Орхон, жүдо бөхөөр К.Ёолк, Б.Ганхайч нар хүрэл, боксоор А.Баттулга мөнгө, Л.Алтанцэцэг хүрэл, 3х3 сагсан бөмбөгөөр эмэгтэйчүүдийн шигшээ баг мөнгө, пара жүдо бөхөд Л.Туруунаа, эрэгтэй баг хүрэл медаль, пара пауэрлифтингээр Э.Содномпилжээ мөнгө, пара байт харвааны төрөлд холимог баг алт, эмэгтэй баг алтан медаль хүртсэн байна. Эдгээр тамирчны сар бүрийн мөнгөн урамшууллын 2026 оны нэгдүгээр сарын 1-нээс олгох эхлэх юм.

Харин Т.Энхжин, Т.Алтжин, Т.Тулга нар чөлөөт бөхийн ДАШТ-ий олимпын бус жинд медаль хүртсэн учраас сар бүр олгодог мөнгөн урамшуулалд хамруулахгүй гэх заалттай билээ.