AFC лигийн тэмцээнийг удахгүй зохион байгуулж эхэлнэ гэдгээ Азийн хөл бөмбөгийн холбоо /AFC/ ням гарагт мэдэгджээ. Ази тив даяарх AFC-гийн гишүүн орны багуудын хувьд олон улсын хөл бөмбөгийн тэмцээнийг сайжруулах зорилгоор уг тэмцээнийг зохион байгуулж байгаа ажээ.

AFC-гийн мэдэгдэлд Олон улсын хөл бөмбөгийн холбооны /FIFA/ олон улсын тоглолтын цонхыг бүрэн ашиглахад тулгарч буй бэрхшээлүүд, түүний дотор өрсөлдөгчийн тоо хязгаарлагдмал, зардал өсөж, логистикийн бэрхшээлүүд тулгарч байгааг дурджээ.

“Эдгээр бэрхшээл нь багуудын илүү зохион байгуулалттай, урьдчилан таамаглах боломжтой, тогтвортой тэмцээнийг бий болгох шаардлагатайг онцлон харуулж байгаа бөгөөд дотоодын хэлэлцүүлэг, зөвлөлдөх үйл явцын дүнд манай холбоо AFC лигийг нэвтрүүлэхээр зарчмын хувьд шийдсэн” гэж тус холбоо мэдэгдсэн байна.

Энэхүү санаачилгын талаар AFC-гийн Ерөнхий нарийн бичгийн дарга Виндзор Жон хэлэхдээ, AFC лиг нь манай 47 гишүүн холбоодын хөгжлийг дэмжих бидний тасралтгүй амлалтад чухал алхам болж байна гэлээ.

“FIFA-гийн олон улсын тоглолтын цонхны үеэр цагийн хуваарийн хувьд тогтвортой, тодорхой спортын урамшуулал бүхий зохион байгуулалттай тэмцээний платформыг нэвтрүүлснээр бид багуудад тулгарч буй логистик болон өртөгтэй холбоотой бэрхшээлүүдийг шийдвэрлэхийн зэрэгцээ өндөр чанартай тоглолтуудыг тогтмол хийх боломжоор хангахыг зорьж байна” гэж тэрбээр нэмж хэлжээ.

Мөн тэмцээний хэлбэр, хугацаа, холбогдох үйл явцын талаарх дэлгэрэнгүй мэдээллийг цаг тухайд нь зарлана гэж AFC тэмдэглэсэн байна.