Завхан аймгийн шагайн харвааны Даян мэргэн холбооны тэргүүн Монголын үндэсний шагайн харвааны холбооны оны шилдэг тайлбарлагчаар шалгарчээ.

Тэрээр үндэсний шагайн харвааны үүсэл гарвал, түүх, соёл, уламжлал, дэг ёс, эрхэмлэх үнэт зүйл, угсаатны бүлгүүд дэх шагайн харвааны онцлог, ялгаа зэргийг судалж, таниулахын зэрэгцээ хүүхэд залуучуудыг энэ спортоор хичээллэхэд нь дэмжлэг үзүүлдэг байна. Түүнчлэн шагайн харвааны талаарх түүх сурвалжийн мэдээ, судалгааны баримтад тулгуурлан энгийн бөгөөд ойлгомжтой байдлаар олон нийтэд хүргэж тайлбарладаг.

Шагайн харвааны тэмцээн бүрээр шагайн харвааг тайлбарлан таниулдаг өөрийн гэсэн тайлбарын өвөрмөц онцлогтой тайлбарлагч юм. Мөн "Даян мэргэн" үйл ажиллагааг дөрвөн жилийн хугацаанд тогтвортой, хүртээмжтэй зохион байгуулж үр дүнд хүрсэн тухай Завхан аймгийн Даян мэргэн холбооноос мэдээлэв. .

-Шагайн спорт-соёлыг хөгжүүлэх үйлсийг Завхан аймаг бодлогоор дэмжиж холбооны олон харваачид хамтран хэрэгжүүлж байна. Завхан аймагт сартуул шагайн харваагаар сүүлийн 300 орчим жил буюу 6-8 үе дамжин цэц мэргэнээ сорьж байна.

Тиймээс, Завхан аймаг шагайн соёлын өлгий нутаг болохын хувьд өв тээгчдээ алдаршуулах, тэдний арга барил, өвөрмөц чадваруудыг таниулах. Өвлүүлэн уламжлуулах, шагайн харвааг сэргээн дэлгэрүүлж хөгжүүлэх. Монгол өв, соёлын дархлааг бий болгох, нийгмийг соён гэгээрүүлэх үйлсэд бодит нөлөө үзүүлэх нь чухал юм. Бид 2021 оноос “Даян мэргэн” үйл ажиллагааг амжилттай хэрэгжүүлж 2024 онд дууссан.

"Даян мэргэн" төслийг эхлэл, суралцахуйн, дэлгэрлийн гэсэн гурван үе шаттайгаар хэрэгжүүлсэн юм. Төслийн хүрээнд Завхан аймгийн хэмжээнд ерөнхий боловсролын 29 сургууль, тусгай мэргэжлийн 2 сургууль нийт 31 сургалтын байгууллага болон төрийн 7 байгууллагад шагайн харвааны сургалтын зурхай, гарын авлага, 8 клубт иж бүрэн сургалтын хэрэгсэл олгосон байна. Аймгийн хэмжээнд 150 орчим шагайн харваач байсан бол "Даян мэргэн" үйл ажиллагаа хэрэгжсэнээр шагайн харваагаар идэвхтэй хичээллэж буй өвлөн уламжлагчийн тоо 500 гаруй болсон.

Энэхүү тоог цаашид нэмэх, монголын өв соёлын нэг болох шагайн харвааг түгээн дэлгэрүүлэх, уламжлуулах, өвлүүлэх, олон нийтэд таниулах нь бидний үүрэг шүү дээ. Тиймээс шагайн харвааны тэмцээн уралдааны үеэр хүүхэд залуучуудад нарийн дэг жаяг, ёс уламжлалыг нь тайлбарлан таниулахыг хичээж ажилладаг хэмээн Завхан аймгийн Даян мэргэн харваачдын холбооны тэргүүн Г.Мягмарсүрэн хэллээ.