“Пари Сен-Жермен” багийн довтлогч Усман Дембеле Олон улсын хөл бөмбөгийн холбооны 2024/25 оны улирлын шилдэг тоглогчоор шалгарсан тухай Х нийгмийн сүлжээн дэх ФИФА-гийн хуудсанд мэдээлжээ.

The Best FIFA Football Awards шагнал гардуулах ёслолын ажиллагаа Доха хотод өчигдөр болсон байна. Улс орнуудын шигшээ багуудын дасгалжуулагчид, багийн ахлагчид, мөн хэвлэл мэдээллийн хэрэгслүүдийн төлөөлөгчид, хөгжөөн дэмжигчдийн дунд явуулсан санал асуулгаар оны шилдгийг тодруулжээ.

Өнгөрсөн улиралд У.Дембеле ПСЖ багийн бүрэлдэхүүнд 53 тоглолтод оролцож, 35 гоол оруулсан байна. Тэрбээр Аваргуудын лиг, УЕФА-гийн Супер цом, Францын АШТ, Францын цом, Францын Супер цомын тэмцээнүүдэд түрүүлснээс гадна клубүүдийн ДАШТ-ий финалд тоглосон юм. Мөн “Алтан бөмбөг”-ийн эзнээр шалгарчээ.

Дембелегээс гадна The Best FIFA Football Awards шагналын төлөө Килиан Мбаппе (Франц, Реал), Рафинья (Бразил, "Барселона"), Ашраф Хакими (Марокко, ПСЖ), Харри Кейн (Англи, "Бавариа"), Нуну Мендеш (Португал, ПСЖ), Коул Палмер (Англи, Челси), Мохамед Салах (Египет, Ливерпүүл), Витинья (Португал, ПСЖ), Ламин Ямал (Испани, Барселона) нар өрсөлдсөн байна.

Өнгөрсөн 2023/2024 оны улирлын шагналын эзнээр “Реал” багийн булангийн довтлогч Винисиус Жуниор тодорч байв.

Энэ удаагийн шилдэг эмэгтэй хөлбөмбөгчний шагналын эзнээр “Барселона” багийн Айтана Бонмати-г тодруулжээ. Өмнө нь тэрбээр “Алтан бөмбөг” шагналыг гурван удаа хүртсэн юм. 

Эх сурвалж: РИА Новости