Узбекистаны Ерөнхийлөгч Шавкат Мирзиёев 20 хүртэлх насны хөл бөмбөгчдийн ДАШТ-ийг Азербайжан улстай хамтран зохион байгуулахад шаардлагатай дэд бүтцийг бэлэн болгох үүргийг өгчээ.
10 дугаар сарын 2-нд ФИФА-гийн зөвлөлөөс U20 насны хөлбөмбөгчдийн ДАШТ-ийг Азербайжан, Узбекистан улсуудад зохион байгуулах шийдвэрийг гаргасан юм.
Ерөнхийлөгчийн шийдвэрийн дагуу Узбекистаны Ерөнхий сайд Абдулла Ариповоор ахлуулсан ДАШТ-д бэлтгэх хороог байгуулж, хөл бөмбөгийн цэнгэлдэх хүрээлэнгүүд, бэлтгэлийн талбай, зочид буудлуудыг бэлэн болгохыг үүрэгджээ. Мөн ДАШТ-ийг өндөр түвшинд зохион байгуулахад шаардлагатай хөрөнгө мөнгийг 2026-2027 оны улсын төсөвт тусгахыг даалгасан байна.
Ерөнхийлөгч Ш.Мирзиеёв 11 дүгээр сарын 11-ний өдөр Шинэ Ташкент хотод барих хөл бөмбөгийн цэнгэлдэх хүрээлэнгийн шав тавих ёслолд оролцжээ. U-20 ДАШТ-д зориулан ФИФА-гийн шаардлагад нийцсэн 55 мянган үзэгчийн суудалтай уг цэнгэлдэхийг 100 сая доллароор барих юм.
Азербайжаны 3, Узбекистаны 3 цэнгэлдэх хүрээлэнд ДАШТ-ий тоглолтууд болох бөгөөд финалын ба хагас финалын тоглолтууд 50 мянгаас дээш суудалтай цэнгэлдэхэд болох ёстой гэсэн шаардлагыг ФИФА тавьж байгаа бөгөөд Узбекистанд ийм стадион байхгүй ажээ.
Эх сурвалж: РИА Новости
