Монголын Волейболын Холбооноос анх удаа зохион байгуулж буй “Хөгжлийн лиг”-ийн тэмцээний 2025/26 оны улирлын 1-р тойргийн тоглолтууд болж өндөрлөлөө. Арван нэгдүгээр сарын 18-ны өдөр эхэлсэн энэ тэмцээний эхний тойргийн хүрээнд 21 өдөр нийт 81 тоглолт боллоо. Үүнээс эмэгтэйчүүдийн 9 баг тус бүр 8 тоглолт, нийт 36 тоглолт хийлээ. 

Эхний тойргийн дараах байдлаар эрүүл мэндийн салбарын төлөөлөл болсон “Doctors” баг тэмцээний хүснэгтийг 6 хожил, 2 хожигдолтой 19 оноотой тэргүүллээ. Тэгвэл “Prime Ilch Dynasty” болон “MMB Sport Academy” багууд адил 6 хожиж, 2 хожигдсон ч онооны зөрүүгээр 2, 3-р байрт эрэмбэлэгдлээ. Товчхондоо лигийн эхний 3 байрын төдийгүй нийт багуудын өрсөлдөөн тун ойрхон, тэнцүүхэн байна. 

“Doctors” баг лигийн эхний тоглолтдоо 2:3 харьцаатай “Golden Ball Lynx” багт хожигдсон. Хэдийгээр тэд тэмцээнийг хожигдлоор эхлүүлсэн ч гадаад тоглогчдоо бүрэлдэхүүндээ нэгтгэснээсээ хойш 6 тоглолт дараалан хожсон нь онцлох үзүүлэлт байлаа. Ингэхдээ бүх тоглолтдоо 3:0, 3:1 харьцаатай хожиж, бүтэн 3 оноогоо авч чадсан онцлох амжилтыг гаргасан юм. Тойргийн сүүлийн тоглолтдоо харин “Сэлэнгэ SBM” багт 3:0 харьцаатай хожигджээ. Энэ нь тэдний тус тойргоос оноо авч чадаагүй цорын ганц тоглолт нь болжээ. “Doctors” багийн бүрэлдэхүүнд Доминикан улсын тамирчин Месалина Северино, БНСУ-ын тамирчин И Жүнсил нар тоглож байна. Мөн холбогч Э.Батцэцэг, голын хаагч О.Сарангоо, довтлогч Г.Болор-Эрдэнэ, чөлөөт хамгаалагч Г.Мөнхтуул нарын “Дээд лиг”-ийн тэмцээнд тоглож байсан тамирчдаас бүрдсэн хүчтэй бүрэлдэхүүнтэй.

Удаах байрт яваа С.Алтанхундага дасгалжуулагчтай “Prime Ilch Dynasty” багийн хувьд лигийн туршлагатай тамирчид болон чадварлаг залуу тамирчдаас бүрдсэн хүчтэй бүрэлдэхүүнтэй баг юм. Багийн бүрэлдэхүүнд 2019, 2025 оны "Дээд лиг"-ийн аварга, спортын мастер Э.Бадамцэцэг, 2019 оны "Дээд лиг"-ийн хүрэл медальт, спортын мастер Б.Ууганчимэг, спортын мастер Б.Дэлгэр-Уянга, спортын мастер Э.Пүрэвжаргал нарын чадварлаг тоглогчид багтаж байна. Тэд ч мөн адил 2-р тойргоос гадны 2 тоглогч бүрэлдэхүүндээ нэгтгэхээр төлөвлөөд байгаа аж. Эхний тойрогт тус баг 6 хожиж, "Doctors", "MMB" багуудад хожигдсон юм. 

“MMB Sport Academy” багийн хувьд тэмцээний хамгийн залуу бүрэлдэхүүнтэй багуудын нэг. Багийн дасгалжуулагчаар гавьяат багш, ОУХМ Д.Солонго болон МВХ-ны 2025 оны шилдэг дасгалжуулагч, спортын мастер А.Мөнх-Эрдэнэ ажиллаж байна. Тэрээр өнгөрсөн жилийн өсвөрийн УАШТ-д алтан медаль хүртсэн багийн бүрэлдэхүүндээ суурилж тус багийг бүрдүүлжээ. Багийн бүрэлдэхүүнд “Дээд лиг”-ийн туршлагатай нэг л тоглогч байгаа нь багийн ахлагч, спортын мастер Л.Баянхангай юм. Бусад тоглогчдын хувьд 2007-2010 оны хооронд төрсөн залуу тамирчид байна. Тэд хэдийгээр насаар бага ч багийн нэгдмэл уур амьсгал, ойлголцол, багийн жигд тоглолтоороо 8 тоглолтоос 6 хожил аваад байна. Ингэхдээ "Doctors", "Хантайшир" багуудад хожигдсон. “MMB" багийн дасгалжуулагч нар тамирчдаа өнгөрсөн зунаас эхлэн тэмцээнд нь бэлджээ.

“Golden Ball Lynx” багийн хувьд эхний тойргийн 8 тоглолтоос 5 хожил нийт 13 оноо авсан. “Golden Ball” сургалтын төвөөс гарч ирсэн тамирчдаас бүрдсэн энэ багт ОУХМ С.Пүрэвжаргал, ОУХМ А.Наранчимэг нарын туршлагатай тоглогчид хүч нэмэн "Хөгжлийн лиг"-ийн тэмцээнд оролцож байна. Бүрэлдэхүүний бусад залуу тоглогчдын хувьд багийн тоглолт, өөрсдийн тогтсон тоглолтын арга барилаараа тоглож байгаа нь тэдний гол давуу тал болж байна. Тус багийн хувьд эхний тойрогт хүснэгтийн тэргүүн байрт яваа "Doctors" багийг хожсон ч "MMB", "Prime Ilch", "MUBSI" багуудад 3:0 харьцаатай хожигджээ.

Тэдний араас "Хантайшир", "Сэлэнгэ", "MUBSI 3х3" багууд ердөө нэг нэг онооны зөрүүтэй 5, 6, 7-р байрт нэхэж явна. Өөрөөр хэлбэл 4 болон 7-р байрт бичигдэж байгаа багуудыг хооронд нь ердөө 3 оноо л зааглаж байна. Тус багуудад 2-р тойрогт амжилтаа ахиулж хүснэгтийн байр ахиа бүрэн боломж бий. Одоогоор 7-р байрын баг 1-р байрын багаас 9 оноо л хоцорч байна. 

Зарим багуудын хувьд тэмцээний өмнө тоглогчдоо бүрдүүлсэн байгаа учраас багийн тоглолт, ойлголцлыг суулгахад тодорхой хугацаа шаардлагатай байна. Тиймээс “Хөгжлийн лиг”-ийн багууд тоглолтоос тоглолтод ахиц гаргаж, улмаар хоёрдугаар тойргоос бүх багийн тоглолт чангарч, өрсөлдөөн илүү ширүүн явагдах нь тодорхой байна. Одоогоор энэ тэмцээний бүх баг ямар нэгэн байдлаар хожиж бас хожигдсон тэнцүүхэн өрсөлдөөн гарч байгаа юм. Мөн дараагийн тойргоос багууд бүрэлдэхүүндээ өөрчлөлт оруулах боломжтой бөгөөд гадаад тоглогчид ч авах боломжтой. 

Нийт хоёр тойргийн тоглолтын дараа буюу баг тус бүр 16 тоглолт хийсний дараа эхний 2 байрт шалгарсан багууд “Дээд лиг”-ийн эрхийн төлөө тоглох боломжтой болно. Эхний 2 байрын баг тэмцээний аваргын төлөө өрсөлдөх бол 3, 4-р байрын багууд шууд хүрэл медалийн төлөө тоглох юм.