Ирэх онд Италид болох Өвлийн олимпын наадмын үеэр гарч болзошгүй зөрчлийг таслан зогсоох хамтын ажиллагааны механизм болох шударга өрсөлдөөнийг хангах Нэгдсэн нэгжийг (JIU) Авлигатай тэмцэх олон улсын өдөр байгуулснаа Олон улсын Олимпын хороо (ОУОХ)  мэдэгджээ.

ОУОХ-ны албан ёсны цахим хуудсанд мэдээлснээр, “Милан-Кортина 2026” наадмыг зохион байгуулах хороотой хамтран байгуулсан уг нэгж нь 2026 оны нэгдүгээр сарын 30-наас хоёрдугаар сарын 24-ний хооронд буюу Олимпын тосгод нээгдэхээс хаагдах хүртэл ажиллах ажээ. Ийм системийг 2012 оны Лондоны зуны Олимпын наадмаас эхлээд бүх наадамд амжилттай хэрэгжүүлж ирсэн байна.

Тус нэгж нь Олимпын үеэр гарч болзошгүй зөрчил, хууль бус үйлдлүүдээс урьдчилан сэргийлэх, илрүүлэх, арилгах чиглэлээр ажиллах ба спортын сахилгын байгууллагууд болон хууль сахиулах байгууллагуудын хооронд мэдээллийг шуурхай, үр дүнтэй солилцох нөхцөлийг бүрдүүлэх зорилгоор байгуулсан байна. Энэхүү системийг Лондоны зуны Олимпоос эхлээд бүх наадмуудад амжилттай хэрэгжүүлж байжээ. 

“Манипуляц хийхээс эхлээд авлига авах, эсвэл итгэмжлэгдсэн хүмүүс ёс зүйгүй үйлдэл гаргах гээд ёс зүйн зөрчил янз бүрийн хэлбэрээр илэрч болно. Хэрэв гэмт хэргийн элемент байгаа бол бид шаардлагатай бүх мэдээллийг өгөхийн тулд Италийн эрх баригчидтай, цагдаа, шүүхийн байгууллагатай хамтран ажиллах болно” гэж ОУОХ-ны ёс зүй, дүрэм журмыг мөрдүүлэх асуудал хариуцсан ахлах мэргэжилтэн Жузеппе Делеонарди тайлбарлав.

JIU-гийн гол чиглэлүүдийн нэг бол тоглолтыг тохиролцохоос урьдчилан сэргийлэх явдал байх юм. Тэмцээн уралдааны дүнд урьдаас нөлөөлөхөөс урьдчилан сэргийлэх Олимпийн хөдөлгөөний нэгж (OM Unit PMC) нь сэжигтэй үйл ажиллагааг илрүүлж, Италийн мөрийтэй тоглоомын салбарын зохицуулагч (ADM) болон Италийн Үндэсний Олимпийн Хороо (CONI)-той нягт хамтран ажиллах ажээ.

Эх сурвалж: Forbes