Бразилын “Сантос” клубт тоглож буй довтлогч Неймар 2022 оны дөрөвдүгээр сараас хойш анх удаагаа хет-трик хийлээ.

Тэрбээр Бразилын аварга шалгаруулах тэмцээний 37-р тойргийн тоглолтод “Жувентуде” /3:0/ багийн хаалганд гурван гоол оруулсан байна. Хамгийн сүүлд Неймар ПСЖ багийн бүрэлдэхүүнд Францын аварга шалгаруулах тэмцээний “Клермон” багтай хийсэн тоглолтод гурван гоол оруулж байсан юм.

Энэ удаагийн хожлын ачаар “Сантос” баг тэмцээний хүснэгтийн 14-р байр руу дэвшиж, сүүлчийн тойргийн өмнө 44 оноотой болжээ. Хэрвээ 17-р байрнаас хойшилбол дээд зиндаанаас хасагдах “аюултай бүс” рүү орох юм. Сүүлчийн тойрогт Неймарын баг 7-ны өдөр “Крузейро" багийг талбайдаа хүлээн авч тоглоно.  

Өдгөө 33 настай Неймар “Сантос” багтай нэгдүгээр сараас хойш хагас жилийн гэрээ байгуулан тоглож байгаа юм. Дараа нь гэрээгээ 2025 он хүртэл сунгасан байна. “Сантос” бол Неймарын хувьд хөлбөмбөгчний замналаа эхлүүлсэн баг бөгөөд тэрбээр тус багийн бүрэлдэхүүнд Бразилын цом, Либертадоресийн цомыг хүртэж байсан юм. 2023 оны 8 дугаар сараас Саудын Арабын “Аль-Хилал” клубт тоглож эхэлсэн Неймар энэ оны нэгдүгээр сард гэрээгээ цуцалсан билээ.

“Аль-Хилал”-д очихоосоо өмнө тэрбээр ПСЖ-д тоглож байсан бөгөөд Парисын клуб түүнийг авахын тулд Испанийн “Барселона”-д хөл бөмбөгийн түүхэнд үзэгдээгүй 222 сая евро төлсөн юм.

ПСЖ-д тоглох хугацаандаа Неймар Францын АШТ-д 5 удаа түрүүлж, Францын Супер цомыг 4 удаа хүртэж, Францын цомд 3 удаа, Лигийн цомын тэмцээнд 2 удаа аваргалж байв. Мөн “Барселона”-гийн бүрэлдэхүүнд Испанийн аваргаар 2 удаа шалгарч, Испанийн цомыг хоёр удаа хүртэж, Аваргуудын лиг, УЕФА-гийн Супер цом, клубүүдийн ДАШТ-д тус бүр нэг удаа түрүүлжээ. 

Эх сурвалж: ТАСС