Монгол Улсад Ардчилсан хувьсгалын 35, Ардчиллын төлөөх намууд нэгдсэний 25 жилийн ойн уламжлалт барилдаан Монгол бөхийн өргөөнд энэ сарын 6-нд болно.
Улс, аймаг, цэрэг болон сумын цолтой чансаа өндөр 128 бөхийн барилдааны түрүүг 10 сая төгрөгөөр мялаах аж. Харин үзүүрлэсэн нь 6, их шөвөгт шалгарсан нь 4 сая төгрөгийн бай гардана. Үүнээс гадна Ардчилсан намын дэргэдэх залуусын “Зориг” ардчиллын хүрээлэнгээс уламжлал болгосон “Зоригтон” бөхийн шагнал олгоно. Хамгийн бага цолтой бөх хамгийн өндөр цолтой бөхийг давсан тохиолдолд энэхүү шагналыг олгодог бөгөөд цом, гурван сая төгрөг дагалддаг билээ. Бөхийн барилдааны бүртгэл өнөөдөр албан ёсоор эхэлж, маргааш 17:00 цагт дуусна.
Өнгөрсөн жилийн Ардчилсан хувьсгалын ойн барилдаанд улсын заан Д.Хүдэрбулга түрүүлж, М.Лхагвагэрэл үзүүрлэж байсан. Харин их шөвөгт улсын начин Э.Сумъяабат, аймгийн начин Д.Төгс-Эрдэнэ сумын заан цолтойдоо шалгарсан юм.
Д.Төгс-Эрдэнийн хувьд нэгийн даваанд улсын арслан Б.Орхонбаярыг, хоёрын даваанд дархан аварга Н.Батсуурийг, гурвын даваанд харцага Д.Лха-Очирыг, дөрвийн даваанд арслан Ц.Бямба-Отгоныг, тавын даваанд улсын арслан Э.Батмагнайг начин цолтойд нь тус тус давснаар “Зоригтон” шагналыг гардаж байлаа.
