Зүүн Азийн супер лигт өрсөлдөж буй Монголын лигийн есөн удаагийн аварга “Хасын хүлэгүүд” багийнхан ээлжит аялан тоглолтоо хийхээр Тайванийн зүг хүлгийн жолоо заллаа.
Тэд хэсгийн дөрөв дэх тоглолтоо Тайванийн аварга “Нью Тайпэй Кингс” багтай тоглоно. Уг тоглолт Тайваньд энэ сарын 6-нд болох бөгөөд Хүлгүүд зочин багийн хувиар оролцоно. Хоёр баг өмнө нь Азийн аваргуудын лигийн хүрээнд хоёр, Зүүн Азийн супер лигээр нэг удаа таарч тоглоход бүгдэд нь “Хасын хүлэгүүд” хожсон юм.
Тэд уг тоглолтын дараа Солонгосын Сөүл хотод “Эл Жи Сэйкерс”-ийн талбайд зочилж тоглоно. Тус баг Солонгосын лигийн аваргуудыг эх орондоо хүлээн авч 105:77-гоор хожоод буцаасан. Ингэснээр 3-0 гэсэн амжилттай цорын ганц баг болсон юм.
Гурван тоглолтын дараах байдлаар Иан Миллер оноо авалтаар хоёрдугаарт, А.Азбаяр хаалтаар гуравдугаарт, Одиги самбарын үзүүлэлтээр тавдугаарт жагсаж байна.
