Олон улсын жүдо бөхийн холбооноос зохион байгуулдаг “Их дуулга” ангиллын ээлжит цуврал тэмцээн АНЭУ-ын Абу Даби хотод болж, Монголын баг IV байр эзэллээ.

52 орны шилдгүүд оролцсон энэхүү тэмцээнд Монголоос гавьяат дасгалжуулагч П.Нямлхагва, дасгалжуулагч Ч.Болдбаатар нарын удирдлагад 15 жүдоч оролцож нэг алт, хоёр мөнгөн медаль хүртсэн юм. Тодруулбал, тэмцээний эхний өдөр эрэгтэйчүүдийн 60 кг-ын жинд гавьяат тамирчин Э.Ариунболд дэд байр эзэлж, монголчуудын медалийн салхийг хагалсан. Тэгвэл хоёр дахь өдөр нь эмэгтэйчүүдийн 63 кг-ын жинд гавьяат тамирчин Л.Энхрийлэн Монголын багийн хоёр дахь мөнгөн медалийг хүртэв.

Харин өчигдөр буюу тэмцээний сүүлийн өдөр +100 кг-ын жинд олон улсын хэмжээний мастер Б.Гончигсүрэн алтан медалиар энгэрээ мялааж, төрийн дууллаа Абу Дабид эгшиглүүлэв. Тэрбээр Эстонийн Карл Прайлинн, залуучуудын дэлхийн аварга Оросын Денис Бачаев, Гүржийн залуу мастер Иракль Деметрашвили, олимпын хүрэл, дэлхийн аваргын мөнгө, хүрэл медальт Оросын Тамирлан Башаев нарыг цувруулан ялснаар алтан медалийн тавцанд зогсох эрхтэй болсон юм. Б.Гончигсүрэн ДАШТ-ээс хойш Улаанбаатарын “Их дуулга”, Чиндаогийн гранпри, Абу Дабигийн “Их дуулга” гэсэн гурван тэмцээнд дараалан түрүүлж байна. Дээрх гурван тамирчнаас гадна эмэгтэйчүүдийн 48 кг-д олон улсын хэмжээний мастер Г.Наранцэцэг VII, +78 кг-д Д.Номинзул V байрт шалгарсан юм. 

Абу Дабигийн тэмцээнд оролцсон 52 орноос 26 нь ямар нэгэн байдлаар медаль хүртсэнээс 11 нь алттай нутаг буцаж байна.

Ташрамд дурдахад, энэхүү “Их дуулга”-ын үеэр Абу Даби хотод Олон улсын жүдо бөхийн холбооны Удирдах зөвлөлийн ээлжит хурал болсон бөгөөд Монголын жүдо бөхийн ерөнхийлөгч Х.Баттулгыг Удирдах зөвлөлийн гишүүнээр шинээр сонгож, Сургалт хариуцсан захирлаар томилсон байна. Б.Гончигсүрэнгийн алтан медаль хүртсэн барилдааны фото агшнаас хүргэе.