Олон улсын жүдо бөхийн холбооноос зохион байгуулдаг “Их дуулга” ангиллын тэмцээний ээлжит цуврал АНЭУ-ын Абу Даби хотод болох гэж байна.
Энэ сарын 28-нд эхлэх тус тэмцээнд одоогийн байдлаар 55 орны 435 жүдоч зодоглохоор мэдүүлэг өгчээ. Тэгвэл манай улсаас эрэгтэй найм, эмэгтэй долоон тамирчин оролцохоор бэлтгэл базааж байгаа юм. Тодруулбал, эрэгтэйчүүдийн 60 кг-ын жинд Э.Ариунболд, Т.Түмэнжаргал, 66 кг-д Ё.Басхүү, 73 кг-д Ж.Энхтөр, 81 кг-д О.Шинэхүү, 90 кг-д Ц.Ган-Эрдэнэ, +100 кг-д Б.Гончигсүрэн, О.Цэцэнцэнгэл нар зодоглоно. Харин эмэгтэйчүүдээс 48 кг-д Г.Наранцэцэг, 52 кг-д Б.Уранзаяа, О.Оюунчимэг, 57 кг-д М.Цэндбазар, Г.Энхжин, 63 кг-д Л.Энхрийлэн, +78 кг-д Д.Номинзул нар өрсөлдөхөөр удахгүй Абу Дабиг зорих юм. Өнөөдрийн байдлаар өгсөн мэдүүлгээс харахад АНЭУ-д болох “Их дуулга”-д 10-аас дээш тамирчны бүрэлдэхүүнтэй зодоглох 20 орон байна.
Ташрамд дурдахад, өнгөрсөн жилийн Абу Дабигийн “Их дуулга”-аас олон улсын хэмжээний мастер Л.Сосорбарам мөнгөн медаль хүртэж байсан бол 2023 онд Б.Баттогтох хүрэл медалиар энгэрээ мялааж байв.
