Олон улсын олимпын хороо (ОУОХ) трансжендэр тамирчдыг Олимпын наадмын эмэгтэйчүүдийн тэмцээн уралдаанд оролцохыг хориглоно гэж “The Times” сонинд мэдээлжээ. 

Эх сурвалжийн мэдээлснээр, эрэгтэйчүүд нь эмэгтэйчүүдээс бие махбодийн хувьд давуу гэсэн шинжлэх ухааны үндэслэлтэй мэдээллийг авсныхаа дараа тус холбоо дээрх шийдвэрийг 2026 оны эхээр гаргах ажээ. Өнгөрсөн долоо хоногт ОУОХ-ны анагаах ухаан, шинжлэх ухааны газрын захирал Жэйн Торнтон эмэгтэйчүүдийн спортод трансжендэр тамирчид оролцож байгаагаас үүдэн тулгарч буй асуудлуудын талаар хийсэн судалгааны урьдчилсан үр дүнг танилцуулжээ. Түүний танилцуулсан дүгнэлтүүд нь нотолгоотой байсан тул нааштай хүлээн авсан байна.

Энэ талаарх ОУОХ-ны шинэ бодлогыг Италид болох Олимпын наадмыг зохион байгуулах хорооны хурлын үеэр танилцуулж магадгүй байна. Одоогийн байдлаар ОУОХ-ны дүрмийн дагуу трансжендэр тамирчид эмэгтэйчүүдийн тэмцээнд оролцож болох боловч эцсийн шийдвэрийг олон улсын спортын холбоод гаргах эрхтэй хэвээр байна.

Токио хотод болсон Олимпын наадамд анх удаа трансжендэр тамирчин оролцсон билээ. Шинэ Зеландын тамирчин Лорел Хаббард эмэгтэйчүүдийн хүндийг өргөлтийн тэмцээнийн 87 кг-ын жинд өрсөлдөж, сүүлийн байрт шалгарчээ. Парисын Олимпын наадмын эмэгтэйчүүдийн боксын тэмцээнд (66 хүртэлх кг) Алжирын трансжендэр боксчин Иман Хелиф түрүүлсэн билээ. Олимпын дараа Францын сэтгүүлч Жаффар Айт Аудиа түүний хүйсийн шинжилгээний талаарх тайланг нийтэлжээ. Шинжилгээгээр Хелифт умай байхгүй, өндгөвч байгааг тогтоосон бол хромсомын шинжилгээр XY кариотип байгааг, дааврын шинжилгээгээр тестостероны түвшин эрэгтэй хүнийхтэй адил байгааг тус тус харуулсан байна.

ОУОХ-ны ерөнхийлөгчөөр сонгогдсоныхоо дараа Кирсти Ковентри эмэгтэйчүүдийн тэмцээнийг хамгаалах бодолтой байгаагаа илэрхийлжээ.

Эх сурвалж: TASS