Засгийн газрын хэрэгжүүлэгч агентлаг Соёл, урлагийн газрын санаачилгаар хэрэгжиж буй “Соёлын бүтээлч сар” аяны хүрээнд Хархорум музей “Монгол бахархал” уриан дор олон талт үйл ажиллагааг өрнүүлж байна. Энэ хүрээнд төрийн шагналт академич Б.Ринчений мэндэлсний 120 жилийн ойд зориулсан “Заан залуудай” номын ертөнцөөр аялах хэлэлцүүлгийг зохион байгуулж, музейн албан хаагчид болон дунд сургуулийн сурагчдыг оролцуулжээ. Хэлэлцүүлгийн үеэр Б.Ринчений намтар, уран бүтээлийг танилцуулж, “Заан залуудай” зохиолын утга санаа, уран сайхны онцлогийг тайлбарлан ярилцсан байна.
Мөн энэ сарын 11, 12-нд төр, шашин, соёлын зүтгэлтэн Өндөр гэгээн Занабазарын 390 жилийн ойд зориулсан “Алтан соёмбо мину”, 24-нд “Бид эх орны түүх” танин мэдэхүйн үйл ажиллагааг зохион байгуулахаар төлөвлөжээ. Үүнээс гадна бүтээлч сарын хугацаанд монгол бахархлын өдөрт зориулсан богино дүрст бичлэгийн уралдаан зарласан байна.
Арваннэгдүгээр сар нь монголчуудын эх хэл, соёл, оюун санааны дархлааг бэхжүүлэхэд онцгой ач холбогдолтой цаг үе учраас энэ сарыг “Монгол бахархал” уриан дор бүтээлч сар болгон тэмдэглэх шийдвэрийг Соёл, урлагийн газар гаргасан юм.

Эх сурвалж: Соёл, урлагийн газар