Киргизийн Бишкек хотноо болсон 2025 оны насанд хүрэгчдийн самбо бөхийн дэлхийн аварга шалгаруулах тэмцээнд 88 орны тамирчид оролцож, спорт, байлдааны болон пара самбо гэсэн ангиллаар аваргуудаа тодрууллаа. Монголын шигшээ багийн тамирчид нийт хоёр алт, таван хүрэл медаль хүртэж, бахдам амжилт үзүүлэв.
Пара самбын төрөлд гавьяат тамирчин, паралимпын хүрэл медальт Б.Ууганхүүгийн удирдлага дор анх удаа гурван тамирчин оролцож, нэг алт, нэг хүрэл медаль хүртжээ. 79 кг-ын жинд Г.Чулуунсүх түрүүлж, алтан медаль хүртэн төрийн дууллаа Бишкект эгшиглүүлсэн бол -98 кг-ын жинд Н.Цэрэнтогтох хүрэл медаль хүртсэн байна.
Спорт самбын төрөлд 64 кг-ын жинд Л.Сумъяа алтан медаль хүртэж, Монголын төрийн дууллыг хоёр дахь удаагаа эгшиглүүлсэн бол дэлхийн аварга, хошой мөнгөн медальт Д.Пүрэвдорж +98 кг-ын жинд хүрэл медаль авснаар дэлхийн аваргын иж бүрэн медальтан боллоо. Мөн эмэгтэйчүүдийн 54 кг-д Н.Баярмаа, байлдааны самбын 64 кг-д Ц.Төгсболд, эмэгтэйчүүдийн ангилалд Э.Номинтуяа нар хүрэл медаль хүртэж, Монголын нийт медалийн тоог долоод хүргэв.

Эх сурвалж: Монголын самбо бөхийн холбоо.