АНУ-ын “Интер Майами” багийн довтлогч, Аргентины домогт тоглогч Лионел Месси хөл бөмбөгийн түүхэнд 400 оновчтой дамжуулалт өгсөн анхны хөлбөмбөгчнөөр тодорлоо гэж ТАСС агентлаг мэдээллээ. Энэхүү амжилтыг тэрээр Америкийн хөл бөмбөгийн тэргүүн лигийн (MLS) шөвгийн 16-д “Нэшвилл” багийн эсрэг тоглолтын үеэр тогтоосон бөгөөд “Интер Майами” баг 4:0 харьцаагаар ялалт байгуулсан юм. Тоглолтын үеэр Месси нэг оновчтой дамжуулалт өгч, хоёр гоол оруулсан байна.
Тэрбээр “Барселона” багт 269, Аргентины шигшээд 60, “Интер Майами”-д 37, “Пари Сен-Жермен”-д 34 удаа оновчтой дамжуулалт хийснээр нийт 400 дамжуулалттай болжээ.
38 настай Месси 2023 оноос “Интер Майами” багт тоглож эхэлсэн бөгөөд түүнийг дэлхийн хамгийн олон “Алтан бөмбөг” (8 удаа) хүртсэн тоглогч гэдгээр нь дэлхий даяар хүлээн зөвшөөрдөг. Тэр 2022 онд Аргентины шигшээ багийг дэлхийн аварга болгож, Америкийн цомд хоёр удаа (2021, 2024) түрүүлж, Финалиссиму (2022) болон 2008 оны Олимпийн наадамд алтан медаль хүртэж байжээ.
“Интер Майами” баг энэхүү ялалтаар цувралыг 2:1 харьцаагаар тэргүүлж, шөвгийн наймд шалгарсан бөгөөд дараагийн шатанд “Цинциннати” багтай тоглоно.

Эх сурвалж: ТАСС