2019 онд гарсан судалгаагаар тархины цус харвалтын хор уршиг, хүндрэл, нас баралтын түвшин өндөр хэвээр байгааг онцолжээ. Судалгааны дүнгээс үзэхэд, тархины задгай болон бөглөрөлтэй харвалтад өртсөн 100 хүнээс 25 нь газар дээрээ нас бардаг бол, 25 нь зургаан сарын дотор амиа алддаг, үлдсэн 25 нь насаараа хөдөлмөрийн чадваргүй болж тахир дутуу үлддэг байна.

Эдгээр тоон үзүүлэлт нь даралт ихсэлтээс үүдэлтэй харвалтыг анзаарахгүй орхих нь ноцтой үр дагавартайг харуулдаг.

Эмч мэргэжилтнүүдийн анхааруулж буйгаар, хэн нэгэн цус харвалтын шинж тэмдэг илэрмэгц хамгийн түрүүнд юу хийх ёсгүйгээ мэдэх нь чухал. Тухайлбал, тухайн хүнд архи уулгах, гар хөлийг нь хөдөлгөх, ямар нэгэн зүйл уулгах зэрэг нь маш аюултай. Ялангуяа судас хагарсан харвалтын үед архи өгөх нь бүр ч хортой, амь насанд хүрэх эрсдэлтэй байдаг.

Өмнө нь даралт ихсэлтийг өндөр настай хүмүүст л тохиолддог гэж үздэг байсан бол өнөөдөр энэ өвчин насны ялгаа үгүй болсныг эмч нар онцолж байна. Тиймээс “чимээгүй алуурчин” хэмээн нэрлэгдэх болсон энэ эмгэгийн үед анхан шатны тусламж үйлчилгээ, түргэн шуурхай арга хэмжээ амь насыг авардаг.

Хэрэв таны ойр дотнын хэн нэгэн ам нь мурийх, гар нь суларч, хэл яриа нь ээдрэх, огих, хараа нь бүдгэрэх зэрэг шинж илэрвэл даруй хэвтүүлж, 103 дугаарт залгах хэрэгтэй. Эдгээр шинж тэмдэг илэрсэн тохиолдолд тухайн хүн харвалт өгөх магадлал 74 хувьтай байдаг гэж эмч нар анхааруулж байна.

Харвалт нь зүрхний шигдээсээс ч илүү яаралтай тусламж шаарддаг өвчин бөгөөд түргэн тусламжийн үйлчилгээ хамгийн түрүүнд очих ёстой өвчний тоонд ордог. Эрүүл мэндийн байгууллагууд эмнэлгийн тусламж үзүүлэх үүрэгтэй ч хүн бүр өөрийн эрүүл мэнддээ анхаарч, урьдчилан сэргийлэх дадлыг хэвшүүлэх шаардлагатай байна.

Харвалтаас сэргийлэхийн тулд зөв хооллолт, тогтмол хөдөлгөөн, даралт, чихрийн шижин, таргалалтаа хянах зэрэг энгийн дадлыг хэвшүүлэх нь хамгийн үр дүнтэй. Мөн хүүхдэдээ хайртай бол амттанд хэт автуулахгүй, хожим үүсэх илүүдэл жин, чихрийн шижин, харвалтаас урьдчилан сэргийлэх хэрэгтэйг эмч нар зөвлөж байна.