Засгийн газрын өнөөдрийн хуралдаанаар “Томуу, томуу төст өвчний дэгдэлтийн үед авч хэрэгжүүлэх зарим арга хэмжээний тухай” тогтоолыг баталж, 2025 оны арваннэгдүгээр сарын 1-нээс 2026 оны гуравдугаар сарын 1-нийг хүртэл хэрэгжүүлэхээр боллоо.

Тогтоолын дагуу 6 хүртэлх насны хүүхдээ томуу, томуу төст өвчний улмаас гэртээ болон эмнэлэгт асарч буй эцэг эх, асран хамгаалагчийн аль нэгэнд ажлын тав хүртэлх хоногийн цалинтай чөлөө олгохыг төсвийн байгууллагын удирдлагуудад даалгаж, хувийн хэвшлийн ажил олгогчдод мөн уриалжээ.

Эрүүл мэндийн яамны тооцооллоор, өвчний оргил үе 12 дугаар сарын дунд үе, нэгдүгээр сарын эхээр тохиох бөгөөд энэ үед долоо хоногт 13–42 мянган иргэн эмнэлгийн тусламж авах төлөвтэй байна. Амьсгалын замын цочмог хүнд халдвараар 1,300–4,600 орчим хүн эмнэлэгт хэвтэхээр тооцжээ.

Судалгаагаар, уушгины хатгаа өвчнөөр эмнэлэгт хэвтэж буй 5 хүртэлх насны хүүхдийн 25 хувь нь томуу, амьсгалын замын вирусээр өвчилдөг бөгөөд энэ насныханд хүндрэх эрсдэл өндөр байдаг. Тиймээс томуугийн эхэн үед хүүхдээ гэрээр асрах боломжийг бүрдүүлэх нь хүндрэлээс сэргийлэх, эмнэлгийн ачааллыг бууруулах ач холбогдолтой гэж үзжээ.

Эх сурвалж: Засгийн газрын хэвлэл мэдээллийн алба