Эрүүл мэндийн яамны дэргэдэх Эмнэлгийн мэргэжилтний ёс зүйн хяналтын хорооноос эрүүл мэндийн байгууллагуудын удирдлага, ёс зүй, хариуцлагыг дээшлүүлэх зорилгоор үндэсний хэлэлцүүлгийг өнөөдөр зохион байгуулж байна. Хэлэлцүүлэгт төрийн болон төрийн бус байгууллагын төлөөлөл, 21 аймаг, нийслэлийн эрүүл мэндийн байгууллага, мэргэжлийн холбоод, анагаахын сургуулиудын төлөөлөл нийт 500 гаруй хүн оролцож, эмнэлгийн мэргэжилтний ёс зүй, төлөвшил, хариуцлагын талаар санал солилцов.

ЭМЯ-ны Төрийн нарийн бичгийн дарга Д.Очирбат хэлэхдээ, эмч, эмнэлгийн мэргэжилтнүүд хүнлэг, энэрэнгүй, үнэнч шударга, хариуцлагатай байх зарчмыг баримтлан ажиллах ёстойг онцолж, эмнэлгийн ёс зүйн дүрмийг шинэчлэх, хуулийн шинэчлэл хийх ажлыг эхлүүлснийг мэдэгдэв. Тэрээр, иргэдийн 82.5 хувь нь эмчдээ итгэдэг ч эрүүл мэндийн байгууллагын үйлчилгээний хандлагад сэтгэл дундуур байгааг судалгаагаар тогтоосон талаар дурдсан юм.

Энэ удаагийн хэлэлцүүлэгт Эрүүл мэндийн яам, Дэлхийн эрүүл мэндийн байгууллага, Авлигатай тэмцэх газар, Цагдаагийн ерөнхий газар, Анагаахын шинжлэх ухааны үндэсний их сургууль зэрэг байгууллагуудын төлөөлөл оролцож, ёс зүйн зөрчлийг бууруулах, урьдчилан сэргийлэх чиглэлээр зөвлөмж гаргаж байна. Үндэсний хэлэлцүүлгээс гарсан зөвлөмжийг салбарын бодлого, үйл ажиллагаанд тусган хэрэгжүүлснээр эрүүл мэндийн байгууллагын ёс зүйн соёлыг төлөвшүүлэх, хариуцлагатай мэргэжилтэн бэлтгэхэд чухал хувь нэмэр оруулах юм.

Эх сурвалж: ЭМЯ.