Монголын үндэсний бөхийн холбооноос уламжлал болгон хоёр жил тутамд зохион байгуулдаг “Алтан цом”-ын барилдаан маргааш эхэлнэ. Энэ удаагийн тэмцээнд үндэсний үйлдвэрлэгч найман компани багаа бүрдүүлж, нийт 64 бөх зодоглоно. Тэдний дунд дархан аварга Н.Батсуурь, улсын аварга О.Хангай, арслангууд Б.Орхонбаяр, Э.Оюунболд, Э.Батмагнай, Ц.Бямба-Отгон, Р.Пүрэвдагва нар багтжээ.

Энэ жилийн “Алтан цом”-д дархан аварга нэг, улсын аварга нэг, арслан тав, заан долоо, харцага арван, начин арван гурав, аймгийн арслан хорин гурван, аймгийн заан хоёр, аймгийн харцага болон начин тус бүр нэг бөх зодоглохоор байна.

Эхний тойрогт “Хамаг Монгол” ба “Хатант интернэшнл”, “Эв Монгол” ба “Хубилай хаан” багууд учраа таарсан бол энэ сарын хорин зургааны ням гарагт “Эм Си Эс-Энержи” ба “Од групп”, “АПУ” ба “Хүлэгү” багууд дэвжээнд гарна. Барилдаан зургаан сарын турш үргэлжлэх бөгөөд тасалбарыг shoppy.mn сайтаар 30, 60, 90 мянган төгрөгөөр худалдаалж байна.

Эх сурвалж: Монголын үндэсний бөхийн холбоо.