Монголын холимог тулааны тамирчдын чансаа тогтоох зорилготой “MGL-1 Fight Night 7” Баянхонгор аймагт ээлжит тулаанаа зохион байгуулахаар болжээ.

Орон нутагт холимог тулаан сонирхогчид нэлээд байдаг бөгөөд тулаан зохион байгуулах хүсэлт цөөнгүй ирдэг байна. Тиймээс энэ удаа тулааныг тус аймагт явуулахаар шийдвэрлэжээ. Энэхүү тэмцээнд мэргэжлийн дөрөв, сонирхогчдын хоёр тулаан болохоор товлосон бөгөөд шилдэг залуу тулаанчид ур чадвар, хүч чадлаа харуулж, “MGL-1” холбооны албан ёсны чансаанд багтах эрхийн төлөө өрсөлдөх юм. Энэхүү тэмцээний оргил тулаан нь Б.Цэндсүрэн, З.Балжинням нарын хооронд өрнөнө. Б.Цэндсүрэнгийн хувьд есөн тулаан хийхдээ тав ялж, дөрөв ялагдсан. Харин З.Балжинням гурав ялж, дөрөв ялагджээ.

Түүнчлэн 70 кг-ын жинд “One Team Fighting Club”-ын тамирчин Э.Баттулгатай өрсөлдөх тамирчин гэмтлийн улмаас тулаанд оролцох боломжгүй болсон тул үзэгчдэд “Жалам хар” нэрээрээ алдаршсан Ө.Баярмандах халз тулааны дуудлагыг хүлээн авч түүнтэй рингэнд гарахаар болжээ. Тус тэмцээнийг “MGL-1” болон Гурван бүсийн холимог тулаанчдын холбоо хамтран зохион байгуулж буй юм. Тулаан энэ сарын 18-нд Баянхонгор аймгийн Спортын ордонд болно.

Ташрамд дурдахад, 2022 онд Гурван бүсийн холимог тулаанчдын  холбооноос Баянхонгор аймагт холимог тулааны тэмцээн зохион байгуулж байсан юм.