Дэлхийн эрүүл мэндийн байгууллагаас /ДЭМБ/ гаргасан шинэ тайланд дурдсанаар, бактерийн гаралтай халдварын ойролцоогоор 20 орчим хувь нь одоо антибиотик эмчилгээнд тэсвэртэй болсон байна. Энэ нь зөвхөн нэг төрлийн антибиотикоор эмчлэхэд хангалтгүй болсон гэсэн үг юм.
ДЭМБ-аас анхааруулснаар микробуудын эмэнд тэсвэртэй болох үзэгдэл дэлхий даяар хурдацтай нэмэгдэж байгаа нь хүн төрөлхтөнд тулгарч буй шинэ аюул болжээ. Тус байгууллага дэлхийн 104 орны 23 сая гаруй хүнийг хамруулсан судалгаагаар 2018 оноос хойш антибиотикт тэсвэртэй халдвар бараг 40 хувиар нэмэгдсэн болохыг тогтоосон байна.
Ялангуяа дунд болон бага орлоготой орнуудад энэ үзэгдэл түгээмэл байгаа бөгөөд эмийг дур мэдэн хэрэглэх, эмчийн зааврыг бүрэн дагадаггүй, мөн буруу антибиотик бичиж өгөх зэрэг хүчин зүйлс үүнд голлон нөлөөлж байна гэж ДЭМБ онцолжээ.
Тайланд дурдсанаар, Зүүн Өмнөд Ази болон Газар дундын тэнгисийн зүүн эргийн улс орнуудад бактерийн гаралтай гурван өвчлөл тутмын нэг нь, харин Африк тивд таван өвчлөл тутмын нэг нь антибиотикт тэсвэртэй болжээ.
“Микробын антибиотикт тэсвэртэй байдал нь анагаах ухааны хөгжлөөс ч илүү хурдацтай нэмэгдэж байна” хэмээн ДЭМБ-ын Ерөнхий захирал Тедрос Адханом Гебрейесус мэдэгдсэн байна.
Антибиотикт хамгийн их тэсвэртэй болж буй халдваруудад уушгины хатгаа, цусан халдвар, шээсний замын халдвар, менингит зэрэг өвчнүүд багтаж байгаа аж. Тухайлбал, Африк тивд уушгины хатгаа үүсгэгч болон E.coli бактериудын антибиотикт тэсвэртэй байдал 50 хувиас давжээ.
Мөн зөвхөн антибиотик эмчилгээ шаарддаг бэлгийн замын халдварт өвчнүүдийн зарим нь ч антибиотикт тэсвэртэй болж эхэлсэн талаар тус байгууллага анхааруулсан байна.
ДЭМБ-аас улс орнуудад антибиотикийн хэрэглээнд хатуу хяналт тавьж, эмийн зохистой хэрэглээг хэвшүүлэх, лабораторийн шинжилгээнд тулгуурласан оношлогоо, эмчилгээний тогтолцоог сайжруулахыг уриалжээ.
