Израилын хөл бөмбөгийн шигшээ баг ирэх онд болох ДАШТ-нд оролцох боломжгүй болжээ. Тус баг урьдчилан шалгаруулах шатны ээлжит тоглолтоо өчигдөр Италийн шигшээтэй талбайд нь хийж, 0:3 харьцаагаар хожигдсон байна.

Израилчууд 7 тоглолтод 9 оноо авснаар I хэсгийн тэмцээний хүснэгтэд гуравдугаарт бичигджээ. Одоо Израилын баг 16-нд Молдавын багтай сүүлчийн тоглолтоо хийнэ. Тус хэсгийг Норвегийн шигшээ /18 оноо, 6 тоглолт/ тэргүүлж, италичууд /15 оноо, 6 тоглолт/ удаалж байна.  

Хэсгээ тэргүүлсэн багууд ДАШТ-нд оролцох эрхээ шууд авах бол хоёрдугаар байр эзэлсэн багууд хоорондоо нэмэлт тоглолт хийнэ.

Хэдэн өдрийн өмнө Испанийн парламентын зарим гишүүн мэдэгдэхдээ, хэрвээ израилчууд ДАШТ-ий эцсийн шатанд шалгарвал Европын аварга Испанийн шигшээ баг тус тэмцээнийг бойкотлоно гэж байсан юм.

АНУ, Мексик, Канадад 2026 оны зургаадугаар сарын 11-нээс долоодугаар сарын 19-нд болох ДАШТ-нд анх удаагаа 48 улсын баг оролцох юм. 

Эх сурвалж: ТАСС