Бодибилдингийн спортыг үндэслэгч Жон Уайдерын санаачилсан АНУ-ын Лас Вегас хотноо бодибилдинг, фитнессийн “Mr.Olympia Amateur-2025” тэмцээн өндөрлөж, Монголын тамирчид гурван алтан медаль хүртсэн байна.
Тодруулбал, бодибилдингийн 70 кг-ын жинд 2017 оны дэлхийн аварга, Монгол Улсын 10 удаагийн аварга, “Арнолд классик” тэмцээний мөнгөн медальт, Д.Энх-Эрдэнэ алтан медалиар энгэрээ мялааж, төрийн дууллаа эгшиглүүлэв. Түүнчлэн “Men’s physique novice”-д Монголын бодибилдинг, фитнессийн холбооны тамирчин Б.Тэлмэн түрүүлж, “С” ангилалд топ таван тамирчны нэг болжээ. Тэгвэл “Men’s physique open F” ангилалд манай тамирчин О.Тэмүүлэн алтан медаль хүртсэн байна. Энэхүү тэмцээнд монголчууд хоёр дахь удаагаа оролцож байгаа нь энэ. Өнгөрсөн жил манай улсаас Б.Уянга, А.Гантулга нар анхлан энэхүү тэмцээнд эх орноо төлөөлж байв.
Ташрамд сонирхуулахад, Монголын тамирчин энэ сарын 22, 23-нд БНХАУ-ын Хэнан мужийн Зэнжоу хотод болох 20 дахь удаагийн “Super series golden times bodybuilding” гранпри тэмцээнд оролцохоор удахгүй урд хөршийг зорих гэж байна. Тус тэмцээний нийт шагналын сан 410 мянган юань юм.
