Азийн залуучуудын III наадам ирэх сарын 22-нд Бахрейн улсын нийслэл Манама хотноо хөшгөө нээж, ес хоногийн турш үргэлжлэхээр болжээ. Энэхүү тэмцээн нь залуу тамирчдын ур чадварыг сорихоос гадна тивийн эв нэгдэл, соёлын онцлогийг харуулах зорилготой юм.

Энэ удаагийн наадамд Азийн 45 орны 5000 гаруй тамирчин спортын 24 төрөлд хүч үзэж, нийт 1677 багц медалийн төлөө өрсөлдөнө. Усан спорт, хөнгөн атлетик, бадминтон зэрэг уламжлалт төрлөөс гадна тэмээний уралдаан, цахим спорт, далайн эргийн хүндийн өргөлт зэрэг өвөрмөц төрлүүд оролцогчдын сонирхлыг татах төлөвтэй байна. Түүнчлэн жүдо, жюү жицү, кабадди, таеквондо зэрэг тулааны төрлүүд болон сагсан бөмбөг, футзал, волейбол зэрэг багийн спортууд хөтөлбөрт багтжээ.

Монгол Улс урьдчилсан байдлаар спортын 20 төрөлд 200 гаруй тамирчнаа илгээхээр бэлтгэлээ хангаж буй бөгөөд тивийн томоохон спортын наадамд амжилттай оролцохоор зорьж байна.

Наадмын медалийн загвар нь “Bahrain” хэмээх үгнээс сэдэвлэгдсэн уран хийцтэй бөгөөд тус улсын соёл, үндэсний онцлогийг илэрхийлжээ. Нийтдээ 505 алт, 503 мөнгө, 669 хүрэл медаль үйлдвэрлэж, тэмцээний ялагчдад гардуулах аж.