Италийн Монза хотод ням гарагт болсон “Формула-1” ангиллын авто уралдааны Гран-Прид Нидерландын уралдаанч Макс Ферстаппен түрүүлснээр энэ улирлын гурав дахь ялалтаа авчээ.
Харин Британийн Ландо Норрис уг тэмцээний дараа “Формула-1”-гийн нисгэгчдийн чансаан дахь оноогоо өсгөсөн байна.
Эхний байрлалаас гараанаас гарсан М.Ферстаппен эхний тойрогт гүйцэгдсэн боловч дөрөвдүгээр тойргоос дахин тэргүүлж эхэлсэн бөгөөд түүнээс хойш тасралтгүй хошуучилсаар Л.Норрисоос 19 секундийн өмнө барианд оржээ. Харин О.Пиастри гуравдугаар байр эзэлсэн байна.
“Өнөөдөр бидний хувьд гайхалтай өдөр байлаа. Нэгдүгээр тойрогт жаахан азгүйтсэн ч түүнээс хойш бид ниссэн. Машин үнэхээр сайн байсан. Багийнхан маань бүгдээрээ гайхалтай сайн ажиллалаа” гэж М.Ферстаппен уралдааны дараа ярилцлага өгөхдөө хэлсэн байна.
Энэхүү гарааны дараах байдлаар, О.Пиастри 324 оноотойгоор нисгэгчдийн чансааг тэргүүлсэн хэвээр байгаа боловч хоёрдугаарт бичигдэж буй Л.Норрис /293/ онооны зөрүүгээ гурваар багасгаснаар 31 онооны зөрүүтэй болжээ. Харин М.Ферстаппен /230/ жагсаалтын гуравдугаарт бичигдэж байна.
2025 оны улирал дуусахад найман Гран-При үлдээд буй энэ үед зохион бүтээгчдийн цомын төлөөх өрсөлдөөнд “Макларен” баг /617/ тэргүүлсэн хэвээр байгаа бол “Феррари” /280/, “Мерседес” /260/ багууд тус тус хоёр, гуравдугаарт бичигдэж байна.
2025 оны “Формула-1”-ийн дэлхийн аварга шалгаруулах тэмцээний дараагийн гараа Азербайжаны нийслэл Баку хотноо есдүгээр сарын 18-21-ний өдрүүдэд болно.
