Ирэх оны ДАШТ-д оролцох эсэхээ хараахан шийдээгүй байна гэж Аргентины шигшээ багийн довтлогч Лионел Месси мэдэгджээ.
Баасан гарагт шилжих шөнө болсон ДАШТ-ий сонгон шалгаруулах шатны тэмцээний 17 дахь тойргийн тоглолтод аргентинчууд Венесуэлийн шигшээг 3:0 харьцаагаар хожсоноор 38 оноотой болж, ДАШТ-д оролцох эрхээ тэмцээн дуусахаас өмнө авлаа. Энэ тоглолтод өдгөө 38 настай Месси хоёр гоол оруулж, дубль хийсэн юм.
“Насаа бодох юм бол дараагийн ДАШТ-д оролцоно гэдэгтээ би эргэлзэж байна. Логикоор бол ийм магадлал бага. Саяхан миний гэмтэл бэртэл илааршсан боловч дахиад л бие таагүй байна” гэж Месси ярьжээ.
“Өөрөө өөрийгөө хуурмааргүй байна. Хэрвээ надад хэцүү байвал тоглохгүй байх нь дээр. Есөн сар гэдэг бол урт хугацаа. Оны эцэст тоглолтын улирал дуусна, харин шинэ улирал эхлэхийн өмнө биеийн байдал ямар байхыг харзнана. MLS лигт бид зорилгодоо хүрч чадна хэмээн найдаж байна. Заримдаа биеийн байдал сайн, зарим үед сайнгүй байдаг. Би эцсийн шийдвэрээ гаргаагүй л байна, гэхдээ итгэл найдвар, хүсэл эрмэлзлээр дүүрэн байж, алхам алхмаар урагшилсаар л байна” гэж Месси нэмж хэллээ.
Тэрбээр Аргентины шигшээгийн бүрэлдэхүүнд 2005 оноос хойш тоглож байгаа бөгөөд таван ДАШТ-д оролцсон юм. 2014 онд аргентинчууд ДАШТ-ээс мөнгөн медаль хүртсэн бол 2022 онд дэлхийн аварга болсон билээ. Мөн 2021, 2024 онуудад Америкийн цомыг хүртэж, 2008 оны Олимпын наадамд түрүүлжээ.
